(Gula 124)
Nabalaka ko pag-ayo sa gisulti ni Prof. Feder Vercelli. Wala pa gyud diay matapos ang among suliran mahitungod sa incubus, ang daotang espiritu nga nanghasi sa pagpuyo namo ni Dirk. Karon misulod na ang maong evil spirit sa lawas ni Bradley aron kini gamitong instrumento sa pagpanghasi namo.
Gihatagan mi ni Prof. Vercelli og daghang pahimatngon aron kami makapangandam sa pag-atake sa incubus. Iyang gi-reiterate nga ang pag-ampo ug pagtuo sa Dios dako’g ikatabang. Misugyot sab siya nga modangop kami kang Fr. Dean Ejara. Gipabenditahan namo sa pari ang mga bentana ug pultahan sa balay sa tuyo nga dili gyud makaagi si Bradley (nga gisudlan sa incubus) ug makasulod sa among balay.
May mga higayon nga sila si Prof. Vercelli ug Fr. Ejara anha matulog sa balay aron makabantay kun moatake na ang incubus. Temporaryo nilang gipadaplin ang managlahi nilang prayoridad kalabot sa propesyon ug bokasyon aron makatabang namo.
Matud pa ni Prof. Vercelli, usa sa ilhanan nga nagpaduol sa among balay ang incubus mao ang pagtay-og sa hinay nga linog nga igong makauyog sa balay. Nasinati namo kini niadtong duha ka higayon nga nakasulod si Bradley sa among balay. Wala mi magdahom nga gisudlan na diay siya sa daotang espiritu niadtong higayona.
Usa niana ka higayon, hapon kadto, nakita nako ang sakyanan ni Dirk nga nag-parking sa atubangang bahin sa hospital nga akong gitrabahoan. Mao pa lang gyuy akong pag-off niadtong tungora. Midali ko’g duol sa nahimutangan sa owner-type jeep.
“Kaganina ka ra?” Gipangutana ko si Dirk nga naglingkod atubangan sa manibela.
Wala siya motingog. Igo lang siyang misenyas nga pasakyon dayon ko. Mibati ko og kahibulong kay dili man ingon niini og mannerism si Dirk. Apan wala ko lang kini hatagi’g pagtagad. Misakay dayon ko. Gipadagan dayon niya ang sakyanan.
Dihang nakamatikod ko nga lain nga dalan ang iyang gisubay, gipangutana ko siya kun asa mi paingon. Wala siya motingog. Gitangtang hinuon niya ang nipis nga maskara sa iyang nawong. Nakugang ko dihang akong nasuta nga dili diay siya si Dirk kun dili si Bradley! -- Sumpayan pa