Pre ayaw!!! pakiluoy nga singgit ni Dennis ngadto kang Ricky nga iyang kumpare nga determinadong mohunos sa iyang kinabuhi niadtong tungora.
Ang pagkablit na lang gyod sa gato sa iyang 9mm nga pistola ang kulang aron iya na nga mapatay ang labing suod niyang higala kaniadto.
Si Ricky nga na mula na pag-ayo ang nawong ug nagpangurog nga nagbitbit sa iyang pistola nga iyang gition ngadto sa iyang kumpare daw giharian sa usa ka dili masabot nga pagbati.
Gusto na unta ni Ricky nga iya na nga kutluon ang kinabuhi sa iyang kumpare niadtong tungora aron matapos na ang iyang pagka traydor ug pagka lampingasan. Apan sa mga higayon nga iya na nga lihokon ang iyang tudlo aron sa pagbuhat sa ingon daw pugngan siya sa iyang tanlag.
Maoy gusto sa iyang tanlag nga pasayloon na lang si Pare Dennis niya nga maoy nitintal sa iyang kapikas sa pagduwa og kalayo uban kaniya ug maoy hinungdan sa pagkabungkag sa ilang pagpuyo kay ang pagpakasala tawhanon samtang ang pagpasaylo balaanon.
Samtang nagpataypatay siya sa iyang lawas og trabaho sa Dubai isip usa ka welder, ang iyang asawa ug ang iyang kumpare kanunay usab nga nagdimdim sa matam-is nga dugos sa himaya.
Klaro ug tataw kaayo nga ang naghari sa galamhan ni Ricky mao ang gugma, kasilag ug pagdumot. Niadtong tungora si Ricky giilogan sa Diyos ug sa Yawa. Katarong ug kadaotan.
Nidaog gayod ang gugma niadtong tungora. Kay inay kabliton na unta ni Ricky ang gato sa iyang pistola iya na man hinuon kining giuli sa sakoban niini. Ug nidagan ug nigakos sa iyang kumpare.
"Di ko makahimo sa pagpatay nimo pre. Kay kadaghan mo ako luwasa sa kagutom ug gikan sa bung-aw sa kaalaotan kaniadto," matud pa ni Ricky nga nagbasol sa iya untang pagsuway og patay sa iyang kompare.
Samtang nagpadayon si Ricky sa paggakos sa iyang kumpare gibati niya nga daw aduna nay kalinaw ug kalipay ang iyang dughan. Daw iya usab nga mabati ang maanindot nga mga awit sa mga manulonda sa langit nga nagsaulog sa kadaugan sa gugma batok sa pagdumot. (Kataposan)