Gula 123
“Misugod na usab ang incubus sa pagpanghasi ninyo,” laktod nga padayag ni Prof. Feder Vercelli sa iyang tubag sa akong pangutana.
“U-unsa?” Nakatuaw ko sa kahikugang.
“Mao kana, Doktora Ingrid Salcano,” sa psychic pa. “Ug niining higayona, mas bangis siya kay sa una niyang pagpanghasi kaninyo.”
“U-unsay buot mong ipasabot, Professor?” Gikan ni Dirk.
“Ang evil spirit nga incubus misulod sa lawas sa usa ka tawo nga maoy gigamit niyang instrumento sa pagpanghasi ninyo,” pasabot sa psychic. “Usa ninyo ka higala ang gisudlan sa espiritu nga incubus.”
“M-my God,” mao ray akong nalitok.
“Dihang akong namatikdan nga mi-lie low sa pagpangatake ang incubus ninyo,” sa psychic pa, “temporaryo ko sab nga gihunong ang pag-monitor niini. Dihang gibalikan ko kini pag-monitor, ulahi na ang tanan. Nakasugod na ang incubus sa pagpanghasi ninyo. Pero dili pa ulahi ang tanan maong gipahibalo ko dayon kamo.”
Takulahaw lang, misantop sa akong hunahuna si Bradley. Suod nga higala ni Dirk si Bradley kaniadto. Nabugto lang ang ilang paghinigalaay ning ulahing mga adlaw tungod sa gibuhat ni Bradley nako. Nakahukom kong suginlan si Prof. Vercelli sa nahitabo sa pagsulod ni Bradley sa among gipuy-an makaduha na ka higayon.
“Makasulod siya bisan serado ang balay ug unya kalit lang usab nga mahanaw,” dugang asoy ko ngadto sa psychic.
“Dinhi siya kaganina, Professor,” sagbat ni Dirk. “Ako siyang napusilan apan kalit lang siyang nahanaw. Mora ba’g gidala lang siya sa hangin.”
“Siya’y gisudlan sa espiritu nga sa incubus,” nagkanayon si Prof. Vercelli. “Angay kamong mangandam. Nakaseguro kong mohimo pag mas grabeng pagpangatake ang incubus kaninyo. Dili gyud siya mohunong pagmugna’g kagubot sa inyong pagpuyo hangtod nga inyo siyang mabuntog.” -- Sumpayan pa