(Gula 88)
Taudtaod kong wala makatingog. Gihinuktokan nako ang gisulti ni Bradley. Akong gihunahuna kun nganong nasayod siya nga nagpahiling si Dirk sa usa ka uro-genito specialist ug nasayran nga baog siya. Gisundan kaha kanunay ni Bradley ang among mga lihok maong nasayod siya sa tanan namong gibuhat?
“Kun ako pa sa imong dapit, Ingrid,” ni Bradley pa didto sa pikas tumoy sa linya sa telepono, “biyaan mo kanang inutil mong bana. Kita’y magtipon. Ipasalig ko kanimo nga kahatagan ko ikaw og anak.”
“Kun mao ra nay imong tuyo, Bradley,” nako pa nga ingon sa napikal, “ingnon ta ka nga wa kay mahimo ug wa kay mapaabot gikan nako. Prangkahan ta lang ka nga bisan sa kamatuoran nga baog ang akong bana, wala mausab ang akong pagbati alang niya.”
Ug gitapos ko ang among panagsulti. Gibutang ko ang awditibo sa telepono. Mibagting kini pag-usab apan wala na nako tubaga. Gipasagdan ko kini nga nagsige’g kuriring. Gisulayan kini’g tubag sa kauban kong doktor apan gibutang niini dayon ang awditibo. Sa akong paniid, morag wala motingog ang nanawag. Si Bradley tingali!
Dihang nahilom na ang telepono, nanawag ko sa company operator. Ako siyang gipangutana kun nganong nakalusot man kadtong tawag ni Bradley Bagutsay nga unta gipasidan-an ko na man siya nga dili ko modawat sa tawag sa maong personahe. Migamit diay og laing ngalan si Bradley maong nakalusot ang tawag niini.
Pagkagabii, wala ko mahimutang sulod sa lawak namo ni Dirk. Nagtutikangkang kog pangawot sa akong bilahan. Misugmat na usab ang pagpangatol sa akong sexual organ. Labihan gyong katola. Morag mabuang ko sa kakatol.
Nagkagrabe ang pagpangatol sa akong genitals. Morag dunay nanggimok sa akong vulva nga maoy hinungdan sa kakatol. Ligas na sa tungang gabii sa dihang milurang ang kakatol. Gibati ko ang kaluya.
Mubo ra kaayo ko’g kinatulgan. Sa akong pagmata sa pagkabuntag, wala ko makabangon. Kapoy kaayo ang akong lawas. – Sumpayan pa