Daghan ang mga pasahero sa Bus North Terminal. Sabado man god, tingpauli sa mga estudyante ug sa nagtrabaho sa siyudad sama nako. Teller ako sa usa ka ahensya. Usa ka tuig pa ako sa maong trabaho. Gradwado ako sa Commerce ug dalaga pa.
Sa front seat ako molingkod sa gisakyan kong mini-bus. Usa ka lalaki ang akong katupad. Sa akong tan-aw, magulang siya nako og lima ka tuig. Bayinte otso ang akong edad. Guwapo ang maong lalaki. Macho. Angayan kaayo sa gisul-ob nga pulang poloshirt nga giparesan og karsones nga maong. Nike ang iyang sapatos.
"Asa ka mokanaog, Day?"
Mitan-aw ako sa lalaki. Mahigalaon ang iyang tinan-awan nako. Nindot siyag pinahiyoman ug milubyok ang kandiis sa wala niyang aping nga nakapasamot sa iyang kaambongan.
"Sa San Isidro. Ngano man unta?" Nagpahiyom sab ko niya, akong gisukna ang kaayo nga iyang gipakita nako.
"Ako, sa San Agustin. First time pa nako kini nga makaadto sa maong lugar."
"Nagsunod lang kini sa akong adtoan. Hinuon, mas mauna akong mokanaog kay kanimo. Silingang lungsod ang San Isidro ug San Agustin."
"Mao ba. Matud sa akong adtoan nga akong ig-agaw, sa munisipyo lang kuno ko mokanaog ug mangutana lang sa iyang gipuy-an kay duol ra kini sa munisipyo."
Miyango-yango ko. "Mag-unsa ka man diay didto?"
"Namatay ang asawa sa akong ig-agaw. Moduaw ko sa haya."
Sa among panagsulti, nakaila kami. Ador ang iyang ngalan.
"Unsa kaha kong orasa moabot sa akong adtoan, Carol?"
Mitan-aw ko sa akong relo sa pulso. Alas sayis sa hapon. Mitan-aw ko kang Ador.
"Alas siyete tua ka na. Basta sunda lang ang gitugon sa imong ig-agaw. Sa munisipyo sa San Agustin ka kanaog."
Nahilom si Ador. Mitan-aw siya sa gawas. Gitutokan ko siya pag-ayo. Niadtong tungora, wa ko kasabot sa akong gibati. Gaan ang akong buot kang Ador. Sukad sa akong pagka dalaga, wa pa ko kasuway og pakigtrato. Daghan man unta ang nangulitawo nako sukad pa sa akong pagtungha sa kolehiyo, apan wa koy nagustohan nila.
"Kada adlaw ka bang mopauli, Carol?"
Miduko ko dihang mitutok si Ador nako. Nagpakaaron-ingnon ako nga nagdula-dula sa akong mga tudlo.
"Di. Every weekend lang." Hinay kong tubag.
Wa na magtingog si Ador. Nagpakahilom na kini. Mihilom na lang sab ko.
Sukad niadtong higayona, wa na mahanaw sa akong hunahuna si Ador. Kanunay ko siyang mahunahuna. Ug di ko lang tuyuon nga mobati kog kamingaw kaniya. Nangandoy ko nga magkakita kami pag-usab. Naseguro ko na nga nahigugma ako kaniya.
Milabay ang usa ka bulan nga si Ador pa gihapon ang kanunay kong mahunahuna. Wa ko mopauli sa San Isidro usa ka Sabado niana. Pagka ugma, Domingo sa buntag, nanimba ko sa Sto. Rosario. Duol sa altar ang akong gilingkoran. Unya misulod sa altar nga pari nga maoy momisa. Nahasiga ang akong mga mata.
Si Ador! Iya sab kong nakita. Gipahiyoman niya ako. Morag taphaw ang pagbalos kog pahiyom kaniya. Naulaw ako sa akong kaugalingon. Nagdali kong migawas sa simbahan. Gianugnan ako sa una kong gugma. Usa ka pari ang akong gimahal. Hilom kong nangayog pasaylo sa Diyos. (Kataposan)