Mipadayag ka sa imong pagsanong sa gitanyag ni Zen, Jamaica. Apan gihatagan mo siyag kondisyon. Gipangayo mo kaniya ang kamatayon ni Yukiko.
"Why?" Nakapangutana si Zen.
"Because I hate him that much," maoy imong tubag.
Gusto ka gyod nga matibaway ang kasilag mo kang Yukiko. Wala sa imong bokabularyo nga magpautang sa mga tawo nga nakasala, nanamastamas ug nakapasakit kanimo. Mao nga gusto kang makapanimalos kang Yukiko.
Tungod ba kaha kay naulipon pag-ayo si Zen sa imong katahom, wala kini makabalibad sa pabor nga imong gipangayo. Misaad siya sa pagpatay kang Yukiko. Pero segurista sab ang Hapon. Gusto niyang mahimo ka na niyang kept woman sa dili pa niya pahamtangan si Yukiko sa kamatayon niini. Misugot ka, Jamaica.
Tuod man, hingpit ka nang gihimong kabit si Zen. Wala na magsamok si Yukiko kanimo. Basta kept woman na ni Zen, wala nay laing lalaki nga puydeng manghilabot niini. Gawas pa, morag nahadlok sab si Yukiko sa imong hulga ngadto kaniya. Wala lang siyay kasayoran nga ipahinayon gyod nimo ang pagpapatay kaniya.
Maayo ang tratamento ni Zen kanimo, Jamaica. Miabang siyag laing flat nga maoy imong gipuy-an. Gusto niyang mobulag ka nag puyo sa tulo nimo ka kaubang Japayuki. Mihunong ka na sab sa pagtrabaho sa Cloud 9 Karaoke Bar. Dili unta mosugot si Takeshi apan napugos kini pagbuhi kanimo tungod sa mando ni Zen.
Gisustentohan ka ni Zen. Kontento ka na bisan live-in lang ang inyong estado tungod kay buhong ka man sa materyal nga mga butang. Dili usab uhaw sa sex kay mokugi man gihapon si Zen bisan dili kini taas og lahutay sa pagpakigpinarayganay.
Usa niana ka gabii, gidala ka ni Zen ngadto sa usa ka abandonadong bodega. Panahon na kuno nga iyang tumanon ang iyang gisaad nimo. Tuod man, pagsulod mo sa bodega, maoy imong nakita si Yukiko nga gigapos sa usa ka haligi. Giapongan siya sa mga sakop ni Zen nga pulos armado.
Miduol ka sa nahimutangan ni Yukiko ug gitamparos mo siya sa makadaghan. (Sumpayan pa)