Sa imong pagtrabaho sa Cloud 9 Karaoke Bar, namatud-an mo nga unfair ang kinabuhi sa kalibotan. Dili maayo ang treatment sa Hapon nga manager sa balay-kalingawan nga imong gialagaran kaninyong Pinoy entertainers. Morag dili tawo ang ilang pagtan-aw ninyo. Sama lang kamo sa mga instrumento nga ilang gigamit paghipos og daghang kuwarta. Kuwarta, kuwarta ug kuwarta ra gyoy ilang gihunahuna.
Apan wala ikaw laing mahimo, Jamaica, gawas sa pagduko aron magpaawot. Sama sa mga kauban mong Pinoy entertainers, imong tinuyoan ang pagpanarbaho sa Japan isip Japayuki busa dili ka angay moreklamo. Apan may mga higayon gayod nga sapoton ka ug mahutdan ka na sa pailob maong makig-irgo ka sa club manager. Apan bisan unsa pa kabug-at ang imong mga katarongan, sa kapolihay ang pagbuot lang gihapon sa manager sa Cloud 9 Karaoke Bar maoy matuman. Kutob ka na lang sa pagpanglingo.
Alas otso sa gabii. Laing gabii na usab sa inyong pagtrabaho sa club. Sa sulod sa dressing room sa Cloud 9 sa Karaoke Bar nagkapuliki kamong mga Pinoy entertainers sa pagpangareglar sa inyong kaugalingon, Jamaica. Sa inyong grupo, ikaw ang giila nga labing sexy nga Japayuki sa bar nga inyong gialagaran. Napuhalan dayon nimo ang ubang Pinoy entertainers sa imong pag-abot sa maong balay-kalingawan.
Ikaw usab ang labing bag-ong nagtrabaho sa maong club. Wala ka pay usa ka bulan sa Japan gikan sa Pilipinas. Ug matud pa sa sinultihan sa mga maru, ikaw sab ang labing hubag sa tanang Japayuki nga nagtrabaho sa Cloud 9 Karaoke Bar.
Samtang kamo nagpaguwapa pag maayo sulod sa dressing room, may nanuktok sa pultahan sa dressing room. Unya naabli ang palid sa pultahan. Misulod ang bayot nga club manager nga si Takeshi. Nagbitbit kinig duplicate key. Ug ikaw, Jamaica, ang gitan-aw niini. Nakasabot ka nga ikaw gyod ang iyang tuyo.
"Jamaica, you got visitor," nagkanayon si Takeshi sa nagkasapid-sapid niining Iningles. "He's waiting for you."
"Still early," mubo ug may kagahi ang imong tubag ngadto sa club manager.
Morag kalit ka lang gisapot sa gipahibalo sa club manager kanimo. (Sumpayan pa)