Sa kinabuhi namong mga commercial sex worker, wala miy katungod nga mamili og kustomer. Kuwarta man ang among tuyo busa bahala na'g luod kaayong nawong ang mamahimo namong kustomer, pilit namo kining alagaran. Customer is always right man lagi. Mao nga bahala na'g luod basta maka-afford, kombate gyod.
May mga higayon gyod hinuon nga mobati ko'g kalagot ngadto sa mamahimo kong kustomer. Duna man goy kustomer nga demanding kaayo. Ang uban morag sobra kaayo'g belib sa kaugalingon. May mga kustomer sab nga tungod ba kaha sa kalaksot sa dagway, luod kaayong ikaparayganay. Duna say antipatiko kaayo. Sus, kun dili pa lang tungod sa kuwartang ilang gibayad, nindot gyod silang tamparoson inig kahuman nila'g pahimulos sa akong lawas. Pero wala na lay personalay, trabaho lang!
"Good news para nimo, Sonia," nagkanayon si Gabor, ang akong bugaw, usa niana ka gabii sa akong pag-abot sa dapit nga maoy hulatanan namo'g mga kustomer.
"Nganong good news man?" Nangayo ko'g katin-awan kang Gabor.
"Duna kay brand new nga kustomer."
"Kinsa?"
"Si Hafid?"
"Hafid? Kalain god og ngan nianang tawhana?"
"Indian national na siya, Day. Tigpatanto og 5-6."
"Mao ba? Kuwartahan diay nang tawhana?"
"Mao gyod. Mao bitaw nga gipresyohan nako'g dako aron dako sab kog madawat nga komisyon."
"Unya, hain man siya karon?"
"Paabot lang. Mobalik kuno siya dinhi mga quarter to eleven."
Tuod man, nianang pagka alas diyes kuwarentay singko sa kagabhion nahiabot ang Indian national nga gikasabot ni Gabor. Nagsakay kini'g motosiklo. Gisugat dayon kini sa bugaw. Nagsulti sila'g makadiyot. Unya mitan-aw sila nako. (Sumpayan pa)