Gula 273
Walay reserbang mga bala si Rodney sanglit inilog ra man niya ang armas nga iyang gigunitan gikan niadtong tawo nga buot mosulod sa among lawak sa among pag-istar sa usa ka pension house didto sa patag. Gilabay ni Rodney ang pistola nga nakabsan na sa mga bala. Iyang gihulbot ang stiletto gikan sa iyang kilid.
Nabalaka ko sa hilom. Magsilbi ba ang hinagiban ni Rodney batok sa armas sa mga tawo ni Mr. Prax Vidoya. Gikuyawan kog maayo. Kun nakaila pa lang kos tanang mga santos, sangpiton ko na ang ilang mga ngalan. Ugaling kay ang akong nahinumdoman mao ra man gyud ang patron sa among lungsod nga si Santa Monica. Sa hilom nangayo kog panabang sa among patron. Bisan dili ko hinimbahon apan namasin ko nga ning takna sa kalisod motabang gihapon siya kanamo ni Rodney.
Gihugtan ni Rodney paggunit ang stiletto nga diha sa iyang mga kamot. Midip-ig siya’g maayo sa bato nga among gipasalipdan. Ingon sa nangandam siya’g maayo sa sunod nga mahitabo. Matag karon ug unya mosil-ip siya ngadto sa gawas sa langob.
“Unsa pay inyong gipaabot?” Milanog ang tingog ni Mr. Vidoya didto sa gawas sa langob. “Wala nay bala ang armas sa lalaki nga kauban ni Eva. Wala na siya magpabuto. Sudla na ninyo sila.”
Dihadiha nabati ko ang mga tunob nga ingon sa nanagdali didto sa gawas sa langob. Gikulbaan kog maayo. Mihakop kanako ang tumang kalisang. Misantop sa akong hunahuna nga madakpan na gayod kami si Rodney sa mga tawo ni Mr. Vidoya.
Unya may milanog nga mga butobuto didto sa ubos sa langob. Kalit lang nahilom ang mga tunob nga akong nadungog kaganina nga ingon sa nag-anam nag paduol sa langob nga among nahimutangan.
“Unsa man tong mga butobuto?” Gipangutana ko si Rodney.
“Kadiyot lang kay magsusi ko,” ni Rodney nga migawas sa bato nga among gipasalipdan ug mainampingong mipaingon sa baba sa langob.
Wala madugay, nahibalik si Rodney sa bato nga akong gipasalipdan.
“May mga polis nga nahiabot,” niya pa. -- Sumpayan pa