Sa nakapahimutang na ko sulod sa hotel, milingkod ko sa ngilit sa mahunolhunol nga kama. Mingaw ang lawak nga akong nahimutangan. Gibati ko ang kalaay sa pag-inusara. Wala lang tuyoa, nahinumdom ko ni Tiyo Camilo. Wala ko kapugngni ang pagdagayday sa akong mga luha. Si Tiyo Camilo ang hinungdan kun nganong naingon ako niini. Siya'y naghimong miserable sa akong kinabuhi.
Sa laing bahin, gibati ko ang gamay'ng consolation. Sa akong gihimo karon, dili na makapanghilabot si Tiyo Camilo nako. Makalikay na ko niya. Dili na siya makapadayon sa pagpahimulos sa akong pagkababaye.
Pagkaugma, nangita dayon ko'g balay nga dunay kuwarto nga kaabangan. Sa akong pagsubay-subay sa kadalanan sa siyudad sa Ormoc, nagbantay ko nga dili makit-an ni bisan kinsa nga nakaila nako. Daghan ra bang taga Isabel nga magkanunayan sa Ormoc. Delikado kun makaila sila nako ug makatug-an sa akong mga ginikanan o ba kaha kang Tiyo Camilo nga nia ra ko sa Ormoc magtago-tago.
Walay bakanteng kuwarto ang mga balay-paabangan nga akong giduol. Mipadayon ko sa paglakaw subay sa sementadong karsada sa siyudad. Misangko ko sa Aviles St. Akong gisubay ang maong dalan. Matag karon ug unya magpanglingi ko sa mga karatola sa pamasin nga kini makatudlo kanako og sulbad sa akong panginahanglan.
Mipadayon ko paglakaw. Wala madugay, akong natukmaan ang usa ka agrivet store. Sa gawas nga bahin sa tindahan akong nabasa ang karatola: Wanted tindera. Sa akong pagkabasa niini, mihukom kong dili lang una mopadayon sa pagpangita og balay nga kapuy-an. Maoy akong unahon ang pag-apply og trabaho sa tindahan og agrivet.
Misulod ko sa tindahan ug mi-inquire. Tayming kaayo nga ang tag-iya mismo sa tindahan maoy akong gikasulti. Gidaygan dayon nako siya nga gusto kong motrabaho isip tindera sa iyang tindahan. Iya kong gidala ngadto sa usa ka lawak nga ang hangin bugnaw tungod sa aircon. Nagsultihanay mi'g maayo.
"Morag familiar nako ang imong panagway, Inday," matud ni Mrs. Ripalda.
Kalit kong gikulbaan sa akong nadungog. (Sumpayan pa)