Gula 25
Dili na gyud nako maantos ang paghimo ni Tiyo Camilo nako nga sex slave. Dili na nako maagwanta ang kanunay niyang pagpahimulos sa akong lawas. Gusto kong mahatagan nag kataposan ang iyang pagpanglugos nako.
Nakahukom kong mopalayo sa among lungsod sa Isabel. Mohunong na ko sa akong pagtuon. Dili mahimong mopadayon ko pag-eskuyla kay nakatultol si Tiyo Camilo sa unibersidad nga akong gitunghaan sa Tacloban. Kun mobalhin sab kog eskuylahan, tingalig mahibulong sila si Papa ug Mama ug mangutikuti sila nako sa hinungdan.
Dili sab mahimong tug-anan ko sila si Papa Adolfo ug Mama Odella sa matuod nga nahitabo kanako. Nahadlok ko nga tinud-on gayod ni Tiyo Camilo ang iyang gibahad. Dili ko buot nga may daotang mahibo sa akong mga ginikanan.
Mao nga ang bugtong paagi nga akong nahunahunaan mao ang paglayas gikan sa among dapit. Nakahunahuna ko nga moadto sa Cebu aron adto modangop kang Kuya Jethro nga nagtungha sa usa ka unibersidad didto. Apan wala ko masuheto sa Cebu. Wala ko makatultol sa iyang gipuy-an mao nga mihukom kong sa Ormoc na lang magtago-tago.
Usa niana ka adlaw’ng Biyernes, wala ko mosulod sa klase sa tanan nakong mga subject. Gipanghipos ko ang akong mga gamit. Bug-os na ang akong hukom nga dili na mopadayon pag-eskuyla. Nagplano ko nga inig kahapon, mosakay kog bus paingon sa Ormoc ug dili na ko molahos sa Isabel. Mo-chek in ko sa hotel samtang mangita pa kog kapuy-an sa Ormoc. May tinigom man ko gikan sa sobra sa allowance nga gihatag sa akong mga ginikanan nako. Kini ang akong gastohon samtang wala pa koy trabaho.
Miabot ang kahaponon. Nananghid ko sa akong landlady nga mopauli ko sa Isabel kay weekend na man. Apan lansis ra kadtong ako. Wala na ko tug-ani ang tag-iya sa boarding house nga dili na ko mopadayon sa akong pagtuon.
Sa terminal, misakay dayon kog bus paingon sa Ormoc. Gabii na sa akong pag-abot sa Ormoc apan daghan pang mga tawo nga nagtikawtikaw sa kadalanan. Nagpakyaw kog tricycle ug nagpahatod ngadto sa usa ka hotel nga nahimutangan dili layo sa sentro sa siyudad. Mi-check in dayon ko. -- Sumpayan pa