Dugay nga mitubag si James. Nagpahunas una kini sa kakutas. Lagmit nagdagan ang bata aron daling makaabot sa balay kay naghangos man kini. Gikutasan pag-ayo.
"Sultihi ko, James," matud ni Rodney. "Imo bang gisultihan ang mga tawo nga nangita kang Eva ku
n hain siya?"
"Wala," matud sa bata. "Gipasidan-an na man mi ni Mama nga kun dunay tawo nga mangutana namo bahin kang Ate Eva, dili gyod mi patug-anon."
Miluag ang akong gibati. Nakuhaan ang akong kahasol ug kabalaka.
"Salamat nga wa ka motug-an nila, James," ni Rodney pa.
"Pero dili gihapon mo angay mokompiyansa, "nagkanayon ang bata. "Nagpadayon sila sa pagpangutana sa kabalayan nga ilang malabyan samtang midali kog pauli dinhi aron pahibaloon kamo. Nia sab sila paingon dinhi. Ug posibleng makatultol sila dinhi sa balay."
Human sa panagsulti nila ni James, giserad-an ni Rodney ang pultahan. Unya mahingawaon siyang miduol nako. Nabasa ko ang kabalisa nga mihulma sa iyang nawong.
"Unsay buhaton ta karon?" Gisukna ko siya. "T-tingalig..."
"Mamiya ta karon dinhi," matud ni Rodney. "Mangikyas ta samtang may panahon pa."
Dihadiha gipanghipos namo ang among mga sapot. Nagdali kami. Paspas ang among mga lihok, daw nag-apas sa dagan sa panahon. Human makapanghipos, nanggawas dayon mi sa kuwarto. Mao say pag-abot ni James gikan sa gawas sa balay.
"Nia na sila paingon dinhi," matud sa bata nga ingon sa nabalaka usab.
"Mobiya mi dinhi, James," matud ni Rodney. "Ikaw na lay pasabot ni Tiya kun mahiuli na unya siya gikang nangompra, ha." Mitando ang bata. Dihadiha, migawas kami si Rodney sa balay agi sa may kusina. Mipalayo dayon mi sa gipuy-an sa iyang iyaan.
"Asa man ta paingon?" Nangutana ko samtang sagol dagan ang among paglakaw.
"Bisan asa," ni Rodney pa."Ang importante nga mahilayo ka sa peligro." (Sumpayan pa)