Salamat, Senyor Santo Niño...! Salamat...!" mga pulong nga nanlugwa sa baba ni Pete, atubangan sa orihinal nga imahen ni Senyor Santo Niño sa sulod sa simbahan sa Basilica.
Human sa duha ka oras nga paglinya, sagol sa daghang pangayaw nga mga debotos nga gustong mohalok sa tiilan sa Milagrosong Bata, nahiabot da gayud si Pete sa atubangan sa imahen sa Balaang Bata.
Karon, natuman na gayud niya ang iyang saaran sa pagdagkot ug paghalok sa tiilan sa imahen ni Senyor Santo Niño, atol sa kasaulogan sa Iyang kapistahan. Taliwala sa kasadya na sa kadalanan nga maoy gihimong rota sa tanang contingents nga misalmot sa gipahigayong Sinulog, midalikyat gayud si Pete sa pagsimba sa simbahan sa Basilica aron ihunghong ang iyang kinasingkasing nga pagpasalamat kang Senyor Santo Niño.
Alang kang Pete, angay lang gayud siya nga magpasalamat ning pistaha karon ngadto sa Milagrosong Patron.
Taho vendor lang si Pete. Ug nagpasalamat siya kang Sir Pat Georsua, ang tag-iya ug tiggama sa labing lamian og templada nga taho sa dakbayan sa Sugbu nga gihimo siyang vendor niini. Nakabaton siya og daghang suki sa Carbon Market sa siyudad. Mao nga sayo sa alas 7 sa buntag pa gani, mahurot na ang duha ka dagkong balde nga iyang sinangayon sa pagsuroy. Lalim bay makaganansiya siya og tag-400 pesos, gikan sa alas-4 sa kaadlawon niyang sinangay-suroy ug hangtod na sa alas 7 sa buntag. Taho-taho vendor lang siya, apan nakaabaga sa galastohan sa iyang pag-self-supporting sa pag-eskuyla sa kursong Accountancy ug moggradwar na siya ning tuiga. Bugtong siyang anak, apan ang iyang mga ginikanan nga naninda lang og utanon sa Carbon Market, dili na makasugakod sa galastohan sa pag-eskuyla niya sa kolehiyo. Mao nga nagkugi si Pete. Ang iyang pagka-taho vendor, iyang gisayidlaynan sa pagpaninda og balut matag gabii, diin ang iyang kinitaan niini, iyang gideposito sa usa ka banko.
Sa edad nga 21, may nagtanyag na kang Pete og hayahay nga trabaho isip dealer ug distributor. Dako'g sweldo! Apan lig-on ang iyang baroganan sa pagpabilin nga usa ka taho vendor ug balut vendor. Maayo ra gyud nga wala siya magpadala sa maong tanyag nga trabaho -- nga tigpayuhot diay sa kinilo ug bultong shabu! Ang suod niyang amigo nga taho vendor nga midawat dayon sa maong tanyag, nagtingkagol na karon sa prisohan sa siyudad, human madakpi sa kapolisan nga way piyansa nga gitugot.
Mao nga ning kasaulogan karon sa PISTA SENYOR, nakasaad si Pete nga modagkot ug magpasalamat gayud kang Senyor Santo Niño, sa paggiya kaniya kanunay nga mahisubay sa matarong dalan sa kinabuhi ug sa tinarong nga pagpanarbaho. Kontento na siya sa iyang pagka-taho vendor. Igo na kaniya ang pagka-balut vendor, isip sayidlayin nga panginabuhian. Nakatabang kini sa iyang paglampos sa pag-eskuyla, ilabi na nga moggradwar na siya sa Accountancy nga wa gyud maghasol sa kabos niyang mga ginikanan. Si Senyor Santo Niño maoy gihimong gabayan ni Pete diha sa way hunong niyang pagpaningkamot.
"Salamat, O, Senyor Santo Niño! Salamat sa paggiya Mo kanako...! mikibot na usab ang baba ni Pete. Migawas siya sa simbahan sa Basilica nga luag ang dughan. (Kataposan)