Sa pagtikyop sa kilumkilom, nakita ko na usab si Pete nga kugihan kaayong nanaygon sa kabalayan ning eskuwater nga dapit sa barangay nga akong gipuy-an sa siyudad. Kun wa ko masayop, mora'g katulo na siya magbalikbalik og panaygon ning among dapit, sa pag-entra gayud sa bulan sa Disyembre.
Nag-inusara siyang nanaygon. Nakaila ko siya sa miaging semana diha sa tindahan ni Nang Norie nga mipahulay sa pagpanaygon ug miinom og softdrink.
Desente ang pamayhon ni Pete. Sa edad nga 30, katalirungan gyud mi. Nasayran ko nga taga Lahug siya ug nabatasan na niya nga manaygong mag-inusara sa bisan asang barangay sa siyudad nga iyang magustohan matag singabot sa pasko.
"Maayo nang manaygon tang usa ra, Bay Al, kay way kabahin...!" nagpahiyom si Pete nga mitug-an nako. "Kuyawan sab ko sa pagsum-ok og panaygon ning inyong dapit, kay nadiskubrehan nako nga daghang langob....!" ug mikatawa si Pete nga mitutok nako.
Ang buot ipasabot ni Pete sa 'langob', mao ang mga balay nga gihimong suyopanan og shabu sa among dapit dinhi sa eskuwater. Nakaatik gyud diay si Pete. Hilabihang pagsiaw sa palusot og shabu dinhi ning among barangay Lutawlutaw. Gihimong panginabuhian sa ubang lumolupyo ang pagpamaligya og mga shabu sa among dapit sa eskuwater. Midagsang ang mga drug pushers. Nagkadaghan ang tiggamitan og shabu sa among barangay. Ang mga tinugyanan sa balaod, wa gyud nahimo sa inilang mga drug pushers sa among barangay Lutawlutaw nga abtik pa sa langgam manatad.
Kalit nga nagkaguliyang ang among dapit sa eskuwater. Nadapit ang akong pagtagad sa mga tawo nga dali da kaayong nagkatapok ning gabhiona. Abtik kong mikanaog sa among balay ug nagpakisusi.
"Milampos sa pag-raid ang mga sakop sa City Anti-Illegal Drugs Special Operation Task Force (CAIDSOTF)! Nasikop na gayud ang inilang mga drug pusher sa atong Barangay Lutawlutaw...!" butyag sa upaw ug dangas nga agtang kong silingan nga maalaan nga Turko kun tan-awon.
Tuod man, nakita ko tuod ang grupo sa kapolisan nga mga sakop sa City Anti-illegal Drugs Special Operation Task Force CAIDSOTF nga miguho gikan sa sudlunong dalan sa among dapit sa eskuwater. Sus, giposasan sila si Baldo, Tigro, Bador ug Binog-mga notadong drug pusher sa among barangay Lutawlutaw nga kalit kaayo ang pag-asenso sa among dapit.
Apan miiknat ang akong kilay. Miguho sab si Pete nga nagkabiba sa iyang sista. Unya, nakita kong misaludo kaniya ang tanang mga polis, nunot ang pagsinggit.
"Sir, mission accomplished ning Paskoha....!" (Kataposan)