Napugwat si Rudy sa iyang pagkatulog dihang gisikdo siya ni Mirang samtang sila nagtupad pagpanghigda. "Rud, nakadungog ka?"
"Sa unsa ba?" May kahalang pa ang mga mata ni Rudy nga nangutana sa asawa.
"Karon ba?" Gikuhit ni Mirang ang bukton sa bana.
"Ukk...Ukk...Ukk...Ugaokkk!!!"
"Ahhh ... tuktugaok sa sunoy?" Daling tubag-sukna ni Rudy.
"Unsay sunoy? Wa gyoy sunoy nang atong silong. Pulos himungaan nang atong mga manok." Tug-an-pahinumdom ni Mirang.
"Unsay buot mong ipasabot, Rang? Nga ang mituktugaok...himungaan?"
"Korekkk!!!" Unya mipalain: "Ug abi mo, Rud. Kun motuktugaok gani ang himongaan ingon arong orasa sa gabii, nagtimailhan kini nga aduna na poy buntis nga ania magpuyo ning atong panimalay."
"Haaaa??? Mao ba?" Ingon sa nakuyawan si Rudy nga mitutok sa asawa.
"Oo, mao kini sulti sa mga karaan. Ug wala pa gyod kini mosipyat. Oh, nganong mora ka mag nahadlok?" Sukna ni Mirang nga nakamatikod sa kabalisa nga gibati ni Rudy. "Hadlok ka nga basig ako ang maong babaye nga namabdos? Ug mapun-an na pod ang unom nato ka anak?"
Naamang si Rudy. Husto ang basa ni Mirang sa iyang panagway. Nahadlok tinuoray siya. Apan dili si Mirang ang iyang gikabala-an. Lain.
Nianang pagka ugma, usa ka dalagita gikuyogan ni Rudy sa klinika ni Dra. Obli Gayne. Iyaha kining gipa-pregnancy test. Wala abtig usa ka oras, nahibaw-an niya ang resulta. Resulta nga nakapahasol kaayo niya. Resulta nga naghatag kaniyag dako kaayong problema.
Unya mihugpa na sab ang kagabhion. Nagakalawom ang kangitngit apan nagpabiling nag-alindasay si Rudy sa iyang higdaanan. Bisag unsaon niyag piyong, makita gyod niya ang suliran nga siya ra mismo ang nagmugna. Walay hunong ang telon sa iyang hunahuna pagsalida sa hubo niyang lawas ug sa dalagita nga iyang gipugos sa pagpakig-sex kaniya. Puwerte bayang tabon sa dalagita sa iyang paraiso. Apan giablihan gyod kini ni Rudy, gisulod ug gihuong. Ug mitiyabaw intawon ang kristal nga napusgay.
"Rudy!!! Rudy!!!" Gisiko na pod siya ni Mirang, kinsa ning higayona mitupad na diay niya ang paghigda. "Na'ay, nakabati ka? Mituktugaok na sab ang atong himungaan sa silong. Aduna gyoy mabdos ning atong balay. Aduna gyod! Kinahanglang ugma puhon ipatsek-up natog doktor kanang duha ta ka dalagitang anak lakip na kanang tin-edyer tang helper. Buwahan, atong masayran kinsa kanila ang nagsabak?"
Morag gibuboag ininit nga tubig ang tibuok kalawasan ni Rudy. Misamot kaigang ang kagil-as nga kaganina ra niyang gibati. Nahadlok siya sa plano nga nahunahunaan sa iyang misis. Oras nga mahibaw-an niini ang matuod, segurado gayod nga magubot ang ilang pamilya.
Wala tuyoa, mipasunding sa alimpatakan ni Rudy ang hitsura sa iyang mga dalagitang anak ug helper. Ang ilang mga tudlo pulos gipunting tumong kaniya ug nagpulipulig tulisok sa iyang tanlag.
"Ikaw, ikaw, ikaw ang sad-an niining tanan! Kay kun wa mo pa lang ako hilabti, dili unta moturok kining usa ka bag-ong kinabuhi sa akong sabakan!" Usa kanila naghilak nga nagyawyaw.
Nanampong si Rudy sa iyang mga dalunggan. Dili siya gusto nga makabati sa maong pagmahay. Kay sama ra nga gihinayhinayan pagsunog ang iyang konsensiya sa impiyerno. Gibasolan na niya ang iyang gibuhat. Oo, gibasolan na niya. Apan unsaon man, nga wala man gayoy pagmahay nga mag-una.
Unya samtang gitakpan ni Rudy ang iyang mga dalunggan sa duruha niya ka palad, mituktugaok na sab ang himungaan nga nakapasamot lamang sa kalisang nga mihasol kaniya. (Kataposan)