(Gula 14)
Gusto si Cyrus nga makighigala sa babaye nga iyang nakita sa may bentana sa atbang nga balay nga nailhan na niya sa ngalan nga Cheska pinaagi kang Noy Gunding. Mangita siya’g tukmang panahon sa pagpakig-ilaila sa personal niini.
“Nganong nangutana ka man, Dong Warner,” gikan kang Noy Gunding nga wala masayod sa tinuod nga ngalan ni Cyrus. “Bahin kang Cheska?”
“A, w-wa man Noy,” mao ray nalitok ni Cyrus.
“Nakagusto ka ba niya?”
“W-wa, Noy. Mi-admire lang ko sa iyang kaguwapa.”
Gitapos na ni Cyrus alyas Warner ang panagsulti nila ni Noy Gunding. Misulod na siya sa banyo ug naligo. Pagkahuman, nag-ilis. Unya migawas siya sa balay ug mipaingon sa tindahan og mga pagkaon sa unahan. Mipalit siya’g usa ka takos nga kan-on ug duha ka potaheng sud-an. Wala siya layhing mangunay og hikay sa iyang pamahaw maong mipalit na lang siya’g mga pagkaon sa gawas.
Human makapamahaw, milakaw dayon si Cyrus. Wala siya mag-usik og panahon. Gisugdan dayon niya ang pagpangita kang Melissa Viloron kay mao kini ang iyang tuyo sa pag-anhi sa Sugbu. Gisudlay niya ang lainlaing dapit sa Sugbu nga iyang nasum-okan. Pamasin nga may nakaila kang Melissa nga makatudlo kaniya sa gilubloban niini, magpangutana siya sa mga tawo nga iyang ikabagat.
Wala siya makakita sukad masukad kang Melissa. Apan ginamit ang hulagway niini nga iyang nakuha sulod sa kuwarto ni Wayne, nakaseguro siyang dili siya maglisod sa pag-ila niini. Matag karon ug unya, ipakita niya ang hulagway ni Melissa ngadto sa mga tawo nga iyang mapangutan-an. Apan walay usa nga nakaila sa babaye nga iyang gipangita. Walay nakatudlo kaniya kun hain magtago si Melissa.
Dihang naudto na, mihilab ang tiyan ni Cyrus sa kagutom. Nangita siya’g restaurant. Didto siya mosangko sa usa ka fastfood outlet sa downtown area. Misulod dayon siya aron mo-order og pagkaon. Human makaorder, nangita siya’g bakanteng lamesa. Iyang nalantawan sa suok nga bahin sa kan-anan ang usa ka babayeng nag-inusara samtang nagkaon si Cheska! -- Sumpayan pa