(Gula 10)
Gikaatubang ni Cyrus ang tag-iya sa balay nga may room for rent. Gipatan-aw siya niini sa duha ka bakanteng lawak. Nakagusto siya sa usa ka lawak nga igo lang kapuy-an og usa ka tawo. Sakto kini sa ventilation ug limpiyo pa kay bag-o lang kuno kining gihawaan sa nag-okupar niini.
“P1,400 ang akong paabang niining kuwartoha,” bungat sa tag-iya sa balay nga nagpaila nga si Noy Gunding. “Libre ang suga ug tubig.”
“Wa nay hinangyoan?” Sukit ni Cyrus.
“Barato na kana, Dong. Ang uban dinhi tag P1,500 ang labing barato, wala pay labot ang suga ug tubig.”
Wala motingog si Cyrus. Napahit niya ang iyang wait.
“Kun kursonada ka,” ni Noy Gunding pa, “mangayo ko’g one month advance ug one month deposit. Mao kana’y patakaran dinhi.”
Mikuot dayon si Cyrus sa iyang pitaka. Miihap siyag P2,800 ug gihatag ngadto ni Noy Gunding. Nagtingsi ang lagas nga midawat sa kuwarta.
“Salamat, matud sa tag-iya sa balay. “Kun may kinahanglanon ka dinhi, ayaw kaikog sa pagpakisayod nako.”
“Salamat, Noy,” mubong tubag ni Cyrus.
Gipahimutang dayon ni Cyrus ang iyang mga gamit sulod sa lawak. Pagkahuman, milakaw siya aron mamalit og mga gamit sa balay ilabi na gayod sa pagpangluto. Palis na siyang nahibalik sa balay dala ang daghang mga pinalit. Nagpahatod siya’g taxi aron dili magbaguod. Gipahimutang niya ang tanan sulod sa balay.
Sayo siyang natulog pagkagabii. Gibati siya’g kakapoy sa pagpahimutang sa iyang mga gamit sa balay kay naghitsas man siya sa gikinahanglan niyang kahilipsan.
Pagkabuntag, sayong mibangon si Cyrus. Gibuksan niya ang bentana sa iyang lawak aron sud-ongon ang dagway sa kabuntagon sa squatter’s area. Nanambo siya. Maoy unang nakadapit sa iyang pagtagad ang usa ka babaye nga nanambo sab sa bentana sa atbang nga balay. Nadani siya sa katahom sa maong babaye. – Sumpayan pa