Nakalupad na ang C-130 gikan sa tugpahanan nga mohatod sa composite squadron sa Sulu. Usa ka sakop sa team sa airforce ug army si Lt. Lino Monares nga natahasan sa pakig-away sa mga rebeldeng Abu Sayyaf nga misiaw pagpanghasi ug pagsabwag sa kagubot sa dapit.
Ang dinahunog sa makina sa higanteng abyon wala makatandog sa paghanduraw ni Lino sa gitalikdan nga hinigugma. Sa iyang tagilawan, mihulma ang masulub-ong panagway ni Bella nga nawili sa iyang pagbiya. Naputol ang hamubo nilang panag-uban sa dinaliang tawag sa serbisyo sa hinigugma. Wala pa mo-usa ka bulan ang pagbakasyon ni Lino.
Malipayon sila sa ilang relasyon. Sandurot kaayo si Lino sa mga ginikanan ni Bella. Wala kini pagsupak sa paghigugmaay sa duruha. Kanunay sila si Lino ug Bella manuroy sa dagat. Pulos sila mahigugmaon sa kalikopan ilabina sa katahom sa baybayon.
"Bel... human sa misyon namo sa kagamhanan, mobalik ko aron magpakasal na ta." Hupong sa kaligdong ang mga saad ni Lino sa hinigugma.
Hugot nga migakos kaniya si Bella. Malaumon kini sa giluwatang saad ni Lino.
"Hagki ko sa panamilit, Lin..." Parayeg kaniya ni Bella. "Hagki ko!"
"Dili panamilit ang ibilin ko nimo nga halok, Bel." Tugob sa pagmahal nga halok niya kang Bella. "Halok kini sa lunsay nga pagmahal ko nimo!"
"Salamat, Lin. Magpaabot ko sa imong pagbalik."
Nahinol ni Lino ang atubangan nga bolsa sa iyang uniporme. May sulod kini nga puting papel. Gikuha niya kini ug gibasa ang nahisulat niini. Gikan kini sa hinigugma.
Nagsabak si Bella, sumala sa giasoy niini sa sulat. Dili matukib nga kalipay ang mitaob sa iyang kahiladman. Gusto siya nga mobalik aron gakson ug hagkan pag-usab ang hinigugma. Apan dili na siya makabalik. Gipilo na lang niya ang sulat ug gibalik sa bulsa.
Kapin sa duha ka tuig ang pakig-away nila ni Lino sa mga bandido sa Mindanao. Bisan kun dili hingpit nga napuhag sa tropa ang mga rebelde apan napiangan kini. Napatay nila ang gikaintapan nga lider sa grupo. Mihuyang ang puwersa niini. Gi-pullout ang tropa nila ni Lino ug gipulihan sa engineering brigade alang sa rehabilitasyon sa dapit.
Nahatagan si Lino sa taastaas nga bakasyon. Gikan sa command headquarters, midiretso siya pagsakay sa fastcraft nga magbiyahean sa Bohol. Pag-abot sa pantalan, misakay siya og van paingon sa pinuy-anan sa gikamingawan nga hinigugma.
Pagbukas sa pultahan, misugat sa mga mata ni Lino ang inahan ni Bella nga nagkugos sa bata nga lalaki. Sa iyang pangagpas, kapin lang sa usa ka tuig ang bata. Nahingangha ang inahan ni Bella pagkakita kaniya.
"Hain diay si Bella, Nang Trudes?" ni Lino nga mitutok sa panagway sa bata. Amgid niya ang bata. "Milakaw ba siya, Nang?"
Wala motubag si Nang Trudes. Gipadayon niini si Lino ug gipalingkod sa ilang hawanan. Walay gililong si Nang Trudes sa ulitawo.
"Usa si Bella sa kapid-an ka mga tawo nga namatay sa pagkatikyaob sa pumpboat atol sa fluvial parade sa miaging piyesta. Natugob pag-ayo ang pumpboat sa naghinobra nga mga sakay niini. Maayo gani kay suwerte nga naluwas ang inyong anak ... si JR sa mangilngig nga trahedya sa suba."
Wala na mamati si Lino sa dugang asoy kaniya ni Nang Trudes. Luhaan ang iyang mga mata nga misakwat sa bata nga gikugos sa apohan. Hugot niya kining gigakos ug giligid sa paghalok. Igo lang sa pag-akbo sa abaga ni Lino ang bata nga wala makasabot sa kahugot ug kalimbatianon sa iyang gakos.
Nahinumdom si Lino sa kataposan niyang halok sa hinigugma nga si Bella nga niadtong higayona nagsabak na diay ni JR. – Kataposan