Mibiya dayon ko sa among dapit. Misakay kog barko paingon sa Cebu. May igsuon man si Papa Segundo nga nagpuyo sa Lahug. Nakahunahuna kong adto modangop sa ilang Tiyo Miguel. Nakatultol man ko sa ilang gipuy-an kay sa nagtungha pa ko sa hayiskol, makadaghan ko nakaadto sa ila kuyog ang akong amahan.
Sa nahitabo sa among pamilya, nawad-an na kog paglaom nga makabaton og katumanan ang gugma namo ni Rodney sa umaabot nga mga adlaw. Nakaseguro kong masilag si Rodney kanako sa higayon nga iyang masayran nga gipatay sa akong amahan ang iyang amahan. Posible pa gani nga akoy iyang panimaslan.
Busa karon pa lang gani, gitun-an ko na ang akong kaugalingon sa paghikalimot kang Rodney. Sakit alang nako ang pagbuhat niini tungod kay gimahal ko siya. Gani gikatugyan ko na man sa makadaghan kaniya ang akong pagka babaye. Apan kinahanglang kalimtan ko siya aron paglikay sa posibleng mas grabe pang suliran sa umaabot. Dili na ko gustong magkakita pa kami pag-usab si Rodney.
Dungan sa pagbiya nako sa among dapit, hingpit na usab akong nahilayo kang Rodney. Nakaseguro kong dili na ko niya handumon. Ug tingali, mahikalimtan ko ra siya sa ngadto-ngadto. Ug ang nahitabo kanamo sa makadaghan mahimo na lang tipik sa kagahapon nga angay nang ilubong sa kalimot.
Pagdunggo sa barko nga akong gisakyan sa pier sa Cebu, misakay kog taxi paingon sa Lahug. Gidumdom nako ang dapit nga gipuy-an nila ni Tiyo Miguel. Gusto kong masayod dayon ang akong uyoan sa nahitabo ni Papa didto sa Bohol.
Apan sa akong pag-abot sa dapit nga maoy gipuy-an nila ni Tiyo Miguel sa Lahug, kahaw-ang ang misugat nako. Nahawan na ang maong dapit. Wala nay kabalayan kay gidemolis. Nalakip sa pagkademolis ang balay sa akong uyoan. – Sumpayan pa