Oy Rodolfo! Ayaw pagtanga diha -- lihok dayon kay tingali og maunhan ka, matud sa amahan nga si Benigno. "Uyab ko na man si Patring Tay pero maulaw lang ko nga moanha sa ila kay istrikta ang inahan niyang biyuda."
"Unsa -- biyuda na diay ang inahan ni Patring?"
"Oo. Wa diay ka mahibalo?"
"Wala kay sukad sa ilang pagpamauli gikan sa Manila wa pa man gyu'd mi magkita."
"Daghan man ang nagsulti nako nga uyab kono nimo Tay si Nang Salud niadtong ulitawo ka pa."
"Oo. Pero naminyo siya'g tinuyo kay kwartahan man ang gusto sa iyang mga ginikanan bisan walay gusto si Salud."
"Unya Tay, kay lima na man ka tuig nga patay si Nanay, wa kay plano nga magminyo og usab?"
"Karon kay biyuda na man diay si Salud magkuyog hinoon ta sa ila karong gabii."
"Maayo hinoon Tay aron dili magsamoksamok ang inahan ni Patring."
Nianang pagka-gabii.
"Maayong gabii diha Inday Salud," nangatahuran si Benigno pag-abot nila sa gamay nga tindahan ni Salud.
"Oy, Benigno! Nasuroy ka man sa gamay kong tindahan, unsa may imong paliton?"
"Palita lang ko og usa ka kaha nga sigarilyo, Day, pero duna 'koy tuyo nimo nga importante kanang kitang duha ra ang magsulti."
"O, sige -- ari ta sa taas balay magsulti. Patring," gitawag niya ang anak dalaga. "Kanaog diha kay ikaw una ang bantay sa tindahan kay duna lang mi panagsultihan ni Benigno."
"Day Salud," sugod ni Benigno sa dihang nakalingkod na silang duha. "Lima na ka tuig sukad sa pagpanaw sa laing kalibutan sa akong asawa apan wala gayud ako magminyo og usab kay namasin ko nga magkita ta og usab nga pulos wala nay kabilinggan. Mao nga pagkahibalo nako nga biyuda kana, nia dayon ako aron sublion nato ang atong kagahapon."
"Nganong karon ka pa man lang motunga, Benigno nga usa na man ka tuig nakong pinaabot nimo?"
"Karon pa man lang ko mahibalo nga biyuda ka na sa dihang gisultihan ko ni Rodolfo."
"Unya -- nangulitawo ra ba nang imong anak sa anak ko."
"Uyab na man kono na sila, Day Salud, pero walay problema niana."
"Uyab na diay na sila? Kini si Patring wa gyud motug-an nako. Unya unsa may imong plano nga uyab na man kaha na sila?"
"Ato silang unhan. Magpakasal ta sunod bulan."
"Kadinalian sab nimo Benigno, mao pa gani imong pagsulti, unya kasal dayon."
"Nakalimot ka nga dugay na man kong nagsulti nimo?"
"Kaniadto pa kadto ug gusto ko nga usbon nimo pagsulti kay basin nausab kana.''
"Na hala, paminawa kini. Day Salud, magpakasal na ta kay ikaw ra gayud ang babaye nga akong gimahal," dayong ukob ni Benigno sa mga ngabil sa biyuda.
"Kanus-a man?" Pangutana ni Salud human mo-utnga tungod sa kadugay nga pag-ukob sa biyudo.
"Sa sunod bulan, tawga ang mga bata kay atong sultihan."
"Unsay inyong isulti, Tay?" nangutana si Rodolfo human makalingkod.
"Mga anak, among gisabotan ni Inday Salud nga magpakasal sa sunod bulan."
"Kadali sab ninyong magpakasal Tay nga mao pa gani inyong pagkita."
"Dugay na mi nga nagplano niana, wala pa mo matawo ug karon lang madayon."
"Kami lang ang mauna, Tay," hangyo ni Rodolfo.
"Sila lang ang paunaha Rod," pakgang ni Patring, "total mga batan-on pa man ta. Sa sunod tuig na lang ta aron usab makapangandam."
"Kusoga sab nimo Tay oy, naunhan pa man ko nimo," matud ni Rodolfo sa dihang nakapauli na sila. – Kataposan