Gula 111
Way tihiktihik ang kombate namo ni Rodney sa ibabaw sa kama. Human sa unang round, namahulay lang mig kadiyot unya gisugdan na usab namo ang ikaduhang round. Unya ang ikatulo, ikaupat ug ikalimang round. Nagtagbaw gyud mig maayo sa pagtagay sa lawasnong kalipay kay inigkaugma mobalik na man si Rodney sa Tagbilaran kay wala pa man mahuman ang iyang summer classes.
Nianang pagkabuntag maoy akong namat-an ang sagunson nga pagtingog sa message alert tone sa akong cellphone. Si Rodney ang nag-text. Gipahibalo ko niya nga nakasakay na siyag bus paingon sa Tagbilaran. Nagpadala pod siyag graphics nako, hulagway sa lalaki ug babaye nga naghilawas. Sipat gyud kini si Rodney.
Pagkagabii, dugay kong natulog. Nabati ko na ang kusog nga hagok nilang Papa Segundo ug Mama Betty didto sa pikas kuwarto apan ako nagpabiling nagmata sulod sa akong lawak. Gipalong ko na ang suga sulod sa akong kuwarto. Naglingkod ko sa akong kama simpig sa may bentana. Naniid ko sa palibot. Gusto kong sutaon kun tinuod ba ang giingon ni Rodney nga nakakita siyag tawo nga naglibotlibot sa tugkaran sa among balay. Masuta ko kini kun magpakita ang maong tawo karon.
Lawom nang gabii. Mingaw na ang palibot. Wala gyud ko makakita og tawo nga katingad-an ang mga lihok nga naglibotlibot sa among balay. Mihigda na lang ko kay hapit na ang ala una sa sayong kaadlawon. Kadali ra kong nakatulog. Unya nagdamgo ko nga nakigtagay ko uban ni Rodney sa lawasnong kalipay.
Miabot ang laing school year. Nakahukom kong mopadayon pag-eskuyla apan mo-shift na ko sa laing kurso. Nursing na ang akong kuhaon. Nagpa-enroll dayon ko. Mibalik kog abang sa kanhi kong boarding house. Nalipay si Rodney pagkasayod nga moeskuyla kog balik. Makahigayon na sab kuno kami kanunay. -- Sumpayan pa