(Gula 48)
Si Mama Betty ang nanuktok sa pultahan sa akong lawak. Giubanan niya sa pagsangpit sa akong ngalan ang iyang pagtuktok. Manihapon na kuno mi.
“Mosunod na ko, Ma,” nako pa nga nagpabilin pang naghigda.
Mihinay kog bangon ug migawas sa akong kuwarto. Nag-amping ko sa akong paglakaw nga dili mamatikdan sa akong ginikanan nga may nahitabo kanako. Gipaningkamotan kung dili mokaang sa akong paglakaw aron dili sila mahibulong.
Pag-abot nako sa komedor, didto na sila si Papa ug Mama nag-atbang sa pagpanglingkod sa atubangan sa lingin nga lamesa nga among kan-anan. Milingkod ko sa silya diin sa atubangan niini may basiyong pinggan nga gipahimutang ibabaw sa lamesa. Nangaon dayon mi. Apan diyotay ray akong gikaon kay wala koy gana. Mihungit lang kog pipila ka kutsara ug miinom nag tubig dayong tindog.
Misulod ko sa CR aron mangihi. Apan mikulismaot ang akong nawong sa ako nang pagpangihi. Gibati ko ang hilabihang kahapdos sa akong pagka babaye. Sa akong pamatyag, morag may laceration sa akong vagina mugna sa pagsulod sa kargada ni Rodney nga gawas nga sakto sa height, labihan pa gyung dakoa.
Paggawas nako sa CR, milahos ko sa akong lawak. Gilabyan ko lang sila si Papa ug Mama nga nangaon pa sa may komedor. Gi-lock nako ang pultahan sa kuwarto ug mihigda. Apan wala dangtig dugay, may nanuktok sa pultahan. Si Mama Betty.
Akong giablihan ang pultahan sa akong kuwarto. Misulod siya aron magsusi sa akong kahimtang. Nabag-ohan kuno siya sa akong mga lihok karon. – Sumpayan pa