Ang 22-anyos nga si Tina, usa ka Commerce and Economy student sa usa sa mga unibersidad sa Slovenia, siya mahiligon ug aktibo sa paugnat sa kusug. Gani unom ka matang sa sports-skiing, roller skating, swimming, running , cycling ug volleyball, ang sepra kaayo niya. Apan bisan pa man niini, wala siya mangandoy nga mamahimong atleta, tungod kay ang iyang gusto makabaton og trabaho nga mopalambo ug mopalig-on sa iyang "creative instincts."
Ang iyang amahan namatay niadtong usa pa lamang siya katuig, busa puros babaye ang nagmatutu ug nag-amoma niya. Kini maoy hinungdan nganong nag-uros-uros ang iyang pagka independent, apan responsabli ug manggihuna-hunaon sa iyang pamilya, nga batasan. Wala ilimod ni Tina nga sa iyang pagtubo, daghan siya og nasugatan nga mga pagsuway ug gihadla usab siya sa kapaet sa mga napakyas niyang pagpakig-relasyon, apan wala kini niya panumbalinga, hinunua iyang gihangop ang pagkinabuhi pinaagi sa positibo nga panlantaw ug baruganan. " I believe that things that don’t break you in your life make you even stronger and today I am a very strong girl," mapasigarbohon niyang deklarasyon.
Niadtong Huwebes mibiya na si Tina sa Slovenian Big Brother House alang sa iyang paglupad paingon dinhi sa Pilipinas. Una niini, giangkon niya ngadto sa iyang mga kaubang housemates nga nakuyawan siya, apan sa samang higayon naghinamhinam pagkaplag unsay nagpaabot niya dinhi sa nasud.
Kinsay mobihag sa kasingkasing ni Tina? Unsay iyang ipakita sa sulod sa Bahay ni Kuya? Unsaon niya paghangop ang kulturang Pilipinhon? Kining tanan matubag sugod karong gabii. Sa samang higayon, ang tanang mga aktibidad ni Bruce didto sa Slovenia dili usab malilong.