Suma pa ni Abanto nga katapusang nakita sa iyang pamilya nga buhi si Ralph nianang pagka kadlawon sa Biyernes Santo, diin mibangon siya ug miadto sa barangay Carreta kay matud pa dunay nahitabo nga sunog. Apan nasuta nga false alarm lamang kini, busa mipauli siya sa ilang balay ug mibalik pagkatulog.
Nianang pagkabuntag gipukaw si Ralph sa iyang manghod ug mao nalay ilang nabatyagan nga wala na siya maglihok, ug wala nay kinabuhi. Nagdumili ang pamilya ni Ralph nga ipailawom ang iyang patay nga lawas sa autopsy, tungod kay dili na sila buot nga madungagan pa ang ilang kasub-anan.
Matud pa ni Abanto nga sa wala pa ang maong hitabo, kanunay nga mobisita sa iyang trabahuan si Ralph ug magpunay og hangyo nga kinahanglan nga dili gayud sila mabungkag isip banda.
"Sige man siya og adto sa akong trabahoan magsige lang og ingon nga ayaw baya mi biya-e maam ha, dili gyud ta ninyo magbungkag,"asoy pa ni Abanto
Midugang si Abanto nga nagkuha sila niadto og sessionist nga drummer kay dihay higayon nga wala makakuyog si Ralph sa ilang mga gigs. Wala siya magdahom nga ang maong sessionist mao na ang mahimong regular nila nga member karon.
Matud pa ni Abanto nga dako kaayo og kakulangan sa grupo ang kamatayon ni Ralph tungod kay dako og natampo ang nahisgutan sa kalampusan nga inanay na karon nga natagamtam nila.
Ang patay’ng lawas ni Ralph gihaya karon diha sa ilang balay sa Mabolo, ug ilubong siya karong Domingo puhon sa Cabantan Cemetery.