Raynang kaserola ang korona

Mga Manash, ang inyong makita sa hulagway nga gitaliwad-an nilang direk Pepe Tariman ug Sir Eking Borromeo mao si Kikay Pangilinan kono, pero ang tinuod niyang ngalan mao si Miguel Flores Vargas busa, gitawag sad siya sa iyang mga silingan diha sa merkado sa Lapu-Lapu City nga, Miguela Zubiri, kay layo ra kono kaayo ang Kikay sa iyang ngalan nga Miguel. Siya’y napiling "Talent of the Year" sa "Pabagaay og Nawong" portion sa program atol sa pagsaulog sa mga cast ug crew sa teleseryeng "Tres Metros" nga nag-one year na niadtong Pebrero 27.

Ang mga bag-o ug mga amateur performers lang ang gipaapil sa maong portion, pero nasayop ang mga organizers, kay gipaapil man ang mga bayot nga mga baga man jud og mga nawong. Gihatagan si Kikay og kalendaryo nga maoy gihimong sentro, mga gift items nga hinatag ni Maam Rose Lim sa Lim’s News and Magazine Center, King Borromeo sa Eking’s Fiberglas Fabrication [gipakapinan og ice cream], inasal ug uban pa gikan nilang Jonkie Ouano, Edith Flores Cabahug, Yangan Water Supply, Talisay City councilor Allan Bucao ug uban pa.

Apan kay wa may naandam nga korona, gikoronahan na lang siya nilang direk Pepe ug Eking og kaserola. Napili nga Dakilang Kasama mao ang over all production assistant nga si Wilnard Smith Banzon tungod sa iyang pagka way bisyo, wa gyod ma-late sukad masukad, way absent, wa pa gyo’y gikaaway [yess, naa sad gyo’y away away usahay sa mga pasaway], ug labaw sa tanan ang iyang pagka kugihan sa pagka karon nga wa pa modako ang ulo, kay modako man jud ang ulo sa mga tawo nga hatagan og importansiya, di ba direk?