Hugyaw nga Talents and Awards Night

Sa adlaw sila mga ordinaryo nga mga empleyado nga maabi-abihon sa mga mamalitay diha sa Gaisano Main ug Countrymall. Apan niadtong Sabado sa gabii, Agosto 12 ilang gipamatud-an nga sila aduna usab diay tinaguan nga abilidad sa pagsayaw hinungdan nga wala sila masipyat sa pagdawat sa makabungog nga pakpak gikan sa mga mitambong sa 36th Talents and Awards Night 2006 nga maoy highlight sa kasaulogan sa ika-56 nga kasumaran sa adlaw nga natawhan ni Chief Executive Officer, Alex Gaisano. Ang maong kalihukan usa sa labing dako nga kalihukan nga kanunay nga gikahinaman ug gipaabot sa mga empleyado sa nahisgutang tindahan tungod kay gawas nga makapa-sundayag sila sa ilang mga tinaguan nga potensyal nilibo usab ang premyo.

Sa Great Hall sa White Gold House gipahigayon ang nahisgutan nga kalihukan diin upat ka mga dance groups nga adunay 30 ka mga partisipante matag contingent ang nagtigi aron mamahimong grand prize winner. Sulod sa 20 minutos kinahanglan nga ilang mapadayag ang tema sa ilang pasundayag. Sa sanag nga panagway sa mga partisipante tataw kaayo ang nagbukal nila nga tinguha nga maangkon ang labing taas nga premyo ug nganong dili man nga P80, 000 man ang nagpaabot nga ganti? Ang second prize, P70, 000, ang mananaug alang sa ikatulong dapit nakadawat og P60,000 samtang ang kinaiwitan nakaangkon og P50, 000. Dunay dugang P30, 000 alang sa best in costume.

Human sa kapin usa ka oras nga tigi, ang grupo kansang tema kinutlo gikan sa pelikulang Pirates of the Carribean maoy nakaangkon sa unang ganti ingon man napili nga best in costume. Ang pasundayag sa maong grupo nagpakita sa mga pirata nga napadpad didto sa Carribean Island nga sa sinugdanan buot mosakop sa mga netibo didto apan sa katapusan nakighigala ug nakighiusa ra sa mga tawo didto. Ang ikaduhang dapit naangkon sa grupo nga nanawagan og kalinaw didto sa Africa diin ilang gipakita ang panagbingkil sa nagkadaiyang tribo didto sa maong lugar. Ang Arabian inspired nga grupo nga nagtawag sa ilang mga kaugalingon nga "The Treasure Hunters" maoy miangkon sa ikatulong dapit samtang 'Fiesta de Brazil" contingent ang fourth placer.

Sa kinatibuk-an mabulukon ug malampuson ang 36th Talents and Awards Night diin dinuyogan sa lamiang pagkaon nga gidalit diha sa talad kan-an, ang birthday celebrator mipadayag sa iyang dakong pasalamat ngadto sa tanang mga empleyado nga matud pa niya sa kalipay ug kasakit, sa kalampusan o kapakyasan, walay puas nga misuporta kaniya sa hataas na nga panahon.