Wala sa bokabolaryo ni DJ Randi kaniadto ang mosulod sa kalibutan sa panibya. Gani igo lamang niyang kikuyogan ang iyang higala kaniadto nga mao gayuy interesado nga mag-DJ dihang miduso ang naulahi og demo tape didto sa usa ka estasyon sa Iligan. Apan unsang-pagka unsaa nga dihang nadasig siya nga mo-submit usab og demo tape siya man hinoon maoy nadawat inay ang iyang higala. Sa sinugdanan gikontrahan sa Program Director sa unang estasyonan nga iyang gialagaran tungod kay ang naulahi adunay "manok" nga maoy buot niini nga madawat apan walay nahimo gumikan kay ang mismong station manager maoy mipili kang Kathlyn sanglit nabihag kini sa sa iyang bugnaw nga tingog sa kahanginan.
Midako nga manggiuwawon si Kathlyn. Pero sa iyang pagtungha sa kolehiyo ug sa mga pagtulun-an sa iyang tiya ug amahan, nakat-on si Kathlyn nga mosalig sa iyang kaugalingong katakos.
"Not all genius can be on radio. It's a talent gyud. If ganahan gyud kang mag-DJ, do everything that you can. If you're a student, digest everything nga gitudlo sa teacher especially kanang speech class, public speaking, whatever nga maka-enhance sa imong speaking ability and self-esteem. Believe in yourself and don't be shy. No guts, no glory," tambag pa niya.
Maisip nga swerte si Kathlyn sa iyang pagpanarbaho tungod kay gumikan sa iyang kakugi ug tinuod nga talento, nahimo naman siyang Program Director sa unang estasyon diin gikontrahan siya sa sinugdanan, hangtud nga wala magdugay og natudlo gayud siya nga Officer-in Charge . Sa Iligan City ug sa kasikbit nga mga dapit, si Kathlyn naila isip DJ Angele.
Tuig 2003, miundang si Kathlyn sa iyang trabaho ug napadpad dinhi sa Sugbo human siya midesisyon nga magminyo. Dinhi nanimpad ug misuway siya pagtrabaho sa Jonie's Chicken kaniadto apan usa lang ka semana miundang na siya sa maong trabaho. "Once a calling, always a calling," pagtumbok pa niya nga ang buot ipasabot ang kalibutan sa DJ mao gayud ang iyang puluy-anan.
Busa inabagan sa iyang kasinatian sa Iligan kaniadto, siya misuway pag-apply sa I FM nga midawat usab kaniya sa walay pagduha-duha. Siya nagsugod isip news reporter sa programa sa maong istasyon kaniadto nga "I, alam mo ba?" Bisan tuod og usa ka minuto lang ang air time sa maong programa, wala kini niya igsapayan hangtud nga nakita sa estasyon ang iyang dedikasyon ug determinasyon hinungdan nga gitudlo na siya nga DJ.
Ang naila sa Iligan nga Angela, karon naila sa mga Sugbuanon isip DJ Randi. Ang maong air name gibunyag kaniya sa usa ka DJ sauna sa maong istasyon diin pasabot niini "igat" sa pinulungan'g Australyano. Kay matud pa, igat siya paminawon sa kahanginan. Sa laing bahin, malipayon si DJ Randi tungod kay nabatyagan niya ang suporta ug pagpangga sa iyang mga kauban nga DJ ilabi na nga siya ra ang nagbinugtong nga babaye nilang tanan.
Tuod man, walo na siya ka tuig, dili lamang sa paglingaw sa mga tigpaminaw, isip DJ kondili mohatag usab siya og mga pagtulun-an. Napamatud-an gayud nga ang pagkamagtutudlo niya anaa sa iyang character. Gani, gusto niya ma-share ang iyang mga kaalam sa matang sa pagpamaba sa radyo o pagka-DJ.
"Nindot gyud ang life as a DJ. Bisa'g offeran pa ko'g job nga higher compensation than this, di gyud nako ikabaylo ang pagka-DJ. Mag-work ka with aircon, you have your callers, your fans and okey kaayo akong relationship with my co-DJ's. Okey sad ang sweldo. Four hours, after that, di pa ka panington. Asa ka mangita ana nga work," pagpa-ambit pa ni DJ Randi.