Gibayran diay ko sa press release?

Pila na ka buwan [or maybe, tuig na gyod kapin] nga wa na koy tambong tambong sa mga meeting sa mga Senior Citizens. Labaw pang wa na gayud ko mo-cooperate, tungod sa pipila ka mga butang nga dili nako masakyan, busa, niadtong Biyernes sa buntag, Hulyo 21, mituyo gayod kog tambong sa Kapamilya Media Forum didto sa Entertainment Plaza sa SM City, aron masayod kog unsay mga kalamboan, kay ang gihisgotan niadtong tungora, mao man ang mga benefits nga madawat sa mga senior citizens. Didto usab ang duha ka abtik nga mga delegado sa Cebu City sa North ug sa South, sila si Congressman Raul del Mar ug Congressman Tony Cuenco. Ang mga halangdong opisyales concerned kaayo sa mga senior citizens ug nagpahibawo nga daghan pa ang mga umaabot nga mga benefits alang sa mga senior citizens nga ilang gipanday.

Gipahibawo usab nila nga sa matag barangay sa bisan unsang syudad ug lungsod duna na gyo'y Senior Citizens Center. Unya kay hapit na man kini aprobahe, mahimo na unya kining balaod diin nalatid nga katungdanan na sa matag mayor sa usa ka syudad o lungsod nga magbutang gayud sa nahisgutang buhatan. Gani, matud pa nga nalatid na gayud diay sa balaod nga kinahanglan nga dunay Office of the Senior Citizens Affairs ang matag City Hall or Municipal Hall, apan nasayran nga, may pipila pa ka mga dapit ang wa magpakabana niini.

Sa laing bahin, natingala ko nga, wa motambong ang nailang haligi sa mga senior citizen sa Cebu City, ug nasayran na lang nako nga, dili na diay siya officer. Gani matud pa, dili na sakop sa OSCA ang among barangay. Labaw sa tanan nakugang ko kay, hold your breath nalista pag-apil sa liabilities sa maong kanhi pangulo, ang akong "TALENT FEES' isip PRO. Hala naunsa na ni? Gibayran diay ko sa matag press release nga mamantala sa Banat News ug The Freeman. Hala wa koy nadawat bisag usa ka dako! JAWSHKHODAY! Wa lagi ko kahibawo!