"Libre patupi/ali namo diri/libre patupi kuoton sad imo permi/libreng inom/ali namo mga dodong/libre inum/kamangon sad ka kon ikaw malipong," matud pa's Bisrock nga bandang Medias, usa sa sobra kap-atan ka mga Bisrock-ing bands dinhi sa atong kasilinganan.
Nahuman sa Medias ang maong kanta human sa ilang pagsumite sa ilang labing unang komposisyon nga may ulohang "Mr. Clean (Dawlim o minubo sa dawat limpyo)" sa 93.1 Smash FM. Apan bisan pa man tuod og ang Mr. Clean maoy nakatagamtam og debut sa kahanginan sa dihang gisumsuman niini ang mahitungod sa makinarya sa paglimpyo sa imahe sa mga tawong igo ra modawat og limpyo - kadtong mga wala'y partisipasyon sa paglihok alang sa pagduso og maayong kawsa, apan nakaani sa merito/kredito, ang Free nga nagdalit og "libreng patupi" maoy nakamugna og usa ka matang sa pagkaukay sa dihang kini nakalusot sa screening, nanganaw-kanaw sa kahanginan, ug nakaani og mga airplay requests.
Silang Rocky Abraham Diaz (guitar, vocals), kanhi tinun-an sa customs administration sa University of the Visayas, ug kasamtangang nagtrabaho sa Unilab; Mark Jacob Comar (guitar, vocals), tinun-an sa electronics and communications engineering sa University of Southern Philippines; Nelson "Darling" Lumasag (bass) nag-alagad sa Liwayway Marketing, Corp. nga tiggama og mga chichirya, ug si Noel Vanguardia (drums), gradwado sa business administration sa University of San Carlos ug ana-a karon sa Nalco Philippines nag-alagad, mga sakop sa choir o mga instrumentalists sa St. Therese Parish-Catholic Charismatic Renewal Movement sa Lahug. Managkauban ang upat nga nagmugna og musika ug nagtinabangay aron mahan-ay diha sa mga linya sa "Free" ang ilang mga namatikdan may kalabutan ang mga mahuyang labi na gyud kadtong ana-a sa mga beauty parlor nga naghaylo og libreng patupi alang niadtong mga lalaki bugti ang gitawag og "sexual favors".
Apan lagbas niini, gipasabot sa Medias nga "we don't really carry the motive of putting these members of the third gender in utter humiliation."
Ilang gipahimug-atan pinaagi sa pag-apas sumpay, "though these homosexuals have exercised gender preference and would want to be respected for such, we just want to encourage them to put up a better means of living and live the good, clean life, then earn that most-sought respect thereafter."
Sa dihang gipangutana kon nganong Medias ang ilang nahukmang pangalan, sila nagkanayon nga "Medias is media, the plural for medium, with an s which emphatically talks about our society in reality. Dili ra ni about issues on homosexuality among music. Para sad ni sa tanan nga among nakita ug nasinati sa adlaw-adlaw nga pagkinabuhi. Bato-bato sa langit ang tamaan wag magalit."