Apan duha pa lang gani ka semana ang pagsalida sa akong nasulat (6:00 p.m. matag adlaw), gibaha dayon og reklamo ang CCTN, dili tungod kay wala sila sa akong sinulat kon dili matud pa nawagtang ang ka alegre ug pagka-kataw-anan, hinungdan nga gipatawag ko ni Tatay Nonito "Dodong" Lim Chua ug kami si Tess Diez, ang kasamtangan usab nga director, miatubang ni Tatay tungod sa maong mga reklamo nga naggikan pa sa layong mga dapit sama sa Ozamis, Surigao, uban pang lugar sa Mindanao. Duna usay mireklamo nga taga Bogo.
Dunay taga Surigao nga miingon nga tungod sa ka serious sa ilang nakita, nahisama na lang sa "Dugong Sagrado" nga sinulat ni Rey Samaco diin, ang bida mao si Roderick Bontilao, ang kasamtangan usab nga director sa "Dear Tatay." May miingon pang taga Bogo nga wa na kini kalainan sa "Dugong Sagrado" "Dear Tatay," ug "Rosalinda" nga sinulat sa beteranong director-writer Ricardo Feliciano. Bisan gani sila si direk Rey Samaco ug direk Ricardo nagduda na nga dili diay ko makamaong mosuwat og comedy, busa nagsugyot sila nga pabalikon og suwat si Pepe Tariman ug ako na lay pasuwaton sa "Dear Tatay" kay drama man diay ang akong forte. Apan nangatarungan ko nga sulod sa duha ka semana nag-establish pa ko sa ubang mga bag-ong mga characterrs nga ang uban, serious gyod tinuod, apan duna say mga kulisaw.
Apan miingon ang pipila ka mga tawo nga sa unang adlaw pa sa "Tres Metros" nalingaw na sila niini. Gusto nilang duna gyo'y comedy palain sa ubang mga sugilanon. Aw, na HALLAH! Wa koy mahimo, apan kinahanglang tiwason ang akong nasulat. Busa, antos una mo, kay wa na rabay laing TV series ron nga binisaya, kana rang makita ninyo sa CCTN.