Tataw kaayo nga ang album usa ka mugna sa ilang hinugpong nga gugma alang sa pagpanukar, usa ka konkretong imahe sa gitawag og makatakod nga "passion for music" sa pundok, gipalutaw ang sentimentalidad pinaagi sa en sepia effect ug giparesan sa usa ka hulagway sa karaang transistor radio nga dagko pa kaayo og baterya ug natibook ang kahulugan tungod sa nagtinalikuray nga letrang "G" alang sa Gangrene.
Kinutlo gikan sa Latin nga terminong "gangraena" nga ang buot ipasabot "eating sore, gangrene refers to death and decay of a body part due to deficiency of blood supply, or is a medical term for the death of a patch of tissue."
Apan bisan pa man og daw sa nagnangnang ang ka negatibo sa kahulugan sa maong termino, wala igsapayan sa pundok nga isul-ob kini isip ilang kinatibuk-ang bansagon. Nakita sa Gangrene ang positibong anggulo sa kasakit ug kangulngol nga mahatag sa kangrena ngadto sa gitakbuyan niini.
"Sa music we would like to be remembered for this aching sensation. Mora'g gikangrena ba, makatawag og pagtagad ang kangutngot. The audio appeal is warm and swelling. And because gangrene spreads rapidly, we would want our music to be that infectious," pagpasabot ni Vann Aznar, usa sa mga gitarista sa pundok, sa gihimong pakighinabi diha's Vanrock Recording Studio pila ka gabii ang nakalabay.
Silang Thirdz Sato (bass guitar), Michael Vincent "Salmo" Salvador (guitarist), John "Gorio" Aznar (drums), Neil Plan (vocals) ug Vann Aznar (guitarist) migamit sa sinambog nga musical style-influences gikan sa death metal ngadto's progressive rock, reggae ug grunge music, ngadto's alternative ug trance, ug nakakab-ot og usa ka matang sa paningog nga ilang gitawag og "typical foreign music sound", apan ang lyrics nahasulat sa Sugbuanong Binisaya alang sa pagsaludar sa dilang pinulungan.
Sa dihang nabuwag na si Neil sa iyang karaang banda nga "MOP", si John gikan sa "Chill", si Salmo human sa pagkabugto sa iyang pakig-uban sa "Powerpuff" ug si Vann sa iyang pakigkumbuya sa "Mother Mayhem", sila nagkatapok aron sukdon ang barometro kon asa nila taman madala ang ilang musikanhong mugna nga karon nisangpot nas pagkahuman sa ilang 11-track album.
"Much as possible we would want our music to take a different path. We want to sound differently from other existing bands. We would want to prove that local bands could also take on a foreign sound and could play so much better," apas-sumpay ni Vann.
Karong gabii, kauban ang ubang local indie bands sama sa Nyor, Whats the Frequency, Kabobo, Mantequilla, Glass of Dirt, Phylum ug Aggressive Audio, ihurot pagbubo sa Gangrene ning maong linawas nga pasundayag ang ilang talento nga madungog sa mugnang "Ood sa Purol", usa sa mga kinaham nga Bisrock nga kanta nga gihulagway ni Salmo nga "pakatok", ug ang "Gahapon" nga nagsaysay sa usa ka nakalabay'ng panid sa panahon.
Matud pa ni Salmo nga hayan makalangkat usab og impresyon karong gabii ang "Pagmahay" nga may kalabutan sa mga pangagho ug pangindahay nganong nag-usik og panahon sa usa ka babayeng dili angayan sa pagtagad.
Ang Gangrene album tag P150 mapalit sa front desk sa Handuraw unyang gabii, samtang ang mga Gangrene-emblazoned shirts mapalit usab sa susamang kantidad.