'Eternity' una ang 'Til I Met You'

Human una ni direk Mark Reyes ang shooting niya sa "Eternity" alang sa Regal Entertainment diin bida sila si Dingdong Dantes, Iza Calzado, Mark Herras ug Jennylyn Mercado tungod kay August 30 playdate niini.

Kini suma pa sa taho sa PangMasa nga midugang nga human sa maong project, una pa sugdan ni direk Mark ang shooting sa "Till I Met You" nila ni Regine Velasquez and Robin Padilla alang sa GMA Films.

Nasayran nga humana ang story conference alang sa "Till I Met You," ug nauyonan nga sa July 19 ang first shooting day. Wala pa matino kon si kinsa pa ang ubang artista nga apil sa cast, ang sigurado nga si Gina Marissa Tagasa ang misulat sa script.

Sa pagkakaron mag-advance taping una si Regine alang sa Pinoy Pop Superstar aron human niini kada adlaw na ang ilang shooting sanglit sa second week of August molarga ang Asia Songbird alang sa tulo ka semana nga concert tour didto sa Europe.

Human usab maong project sugdan na ni direk Mark ang taping sa "Atlantica" alang sa GMA-7 diin sila si Dingdong, Iza ug Pauleen Luna ang gikatahong mga bida.

Chyx nakigbalik sa Indian

Nakigbalik na diay si"PBB" housemate Chx Alcala sa iyang Indian boyfriend nga si Love Thadani niadtong June 19,hinungdan nga matud pa niya nakalimot na siya sa nahitabo nila ni Sam Milby samtang didto pa siya sa "Bahay ni Kuya."

Miingon si Chx ngadto sa PangMasa nga tukma ang desisyon ni Big Brother nga dili una sila ipa-istorya dayon ngadto ni bisan kinsa human nila og gawas sa balay tungod kay ang unang impormasyon nga ihungot ngadto nila labi na og negatibo maoy motatak sa ilang hunahuna ug lisud na nga makalimtan.

Dungan niini mapasalamaton si Chx nga naapil gihapon siya sa second season sa "Gudtym" nga magsugod na sunod semana. Miingon siya nga naguol siya alang sa iyang mga kaubang housemates nga wala nay projects karon.

Samtang sugod sa July 15, ang sugod sa second season sa "Gudtym" diin matag Sabado na kini sa 9:30 sa gabii.

Ruffa Mae apil na sa Captain Barbell

Daghan ang naghinam-hinam nga makakita unsa kaha nga sexy costume ang sul-obon ni Rufa Mae Quinto inig lugwa niya sa "Captain Barbell" karong semanaha.

Nasayran sa PangMasa nga kanunay nga makita si Richard Gutierrez isip Captain Barbell karong semanaha tungod kay nangitag paagi sila si Viel (Richard Gomez) ug Borris (JC de Vera) madakpan nila ang nahisgutan nga Pinoy superhero.

Samtang usa ka oil tanker ang mobangga sa bus nga sakyan nila ni Teng (Richard Gutierrez)ug sa iyang lola Melay. Inig gawas unya ni CB, mag-sangka sila ni Borris. Muabot si Barbara (Angel Aquino) ug pugngan sila apan si Barbara ang maigo inig ulbo sa oil tanker nga maoy makaingon sa iyang kamatayon.

Ipalakaw ni Borris nga gisulong ni CB si Barbara hinungdan nga namatay ang naulahi. Buot ni Viel nga manimalos sila kang CB apan ang tinuod buot lang niya nga makuha ang dugo niini kay gikinahanglan niya kini sa iyang transfusion alang sa nagkagrabe na nga sakit.

Sila si Kit (Camille Prats) ug Bobby (Ryan Yllana) masuroy ngadto sa usa ka gymn ug ilang mahimamat si Patti (Marissa Sanchez), nga buot nang moniwang sanglit gisungod na siya nga 'aerobiik' hinungdan nga bisan unsa na lang nga tambal ang iyang imnon. Sa pagmata ni Patti usa ka adlaw niana, mausab na siya ug mahimo na nga si Rufa Mae.