"The band used agipo as a metaphor for the warmth, the spark, the light, and the glow we would want to provide through our songs," pamahayag ni Jorge "Bisoy" Tapales, ang vocalist sa maong banda.
Gibatbat usab sa Agipo nga ang termino adunay "spiritual significance" sa lungsod sa Carmen. Sumala pa sa gipasa-pasang mga sugilanon sa katiguwangan, usa ka agipo ang nakitang milagrosong naglutaw nga wala mapalong sa tubig sa dagat. Sa dihang gidala kini sa mga mananagat sa mamala, matud pa takulahaw kining nahimong imahen sa Milagrosong Bata - ang Señor Sto. Niño.
Bisan pa man og wala ni bisan kinsa sa pundok ang lumad nga taga Carmen, ilang gilukdo ang maong pangalan isip pagtahud sa Sto. Niño kinsa milagrosong mikawas sa nagbagang kahoy ngadto sa pagkaporma nga imahen nga karon giludhan, gihalaran ug nahimong sentro sa mga pangilaba.
Gawas kang Bisoy (vocalist ug composer, BA Communication Arts graduate, Cebu Normal University), silang Algin John Tirol (lead guitar, Computer Science student sa University of Cebu-Banilad campus), Dennis Raphael "Raphy" Moga (drums, Electronics and Communications Engineering student sa UC), Ronnie Bayabos (bass, Electrical Engineering graduate, University of the Visayas) ug Joje Cleofas (rhythm, BS Information Management graduate sa UC) nag-abot gikan sa nagkadaiyang lakat sa panginabuhi dinuyugan sa impluwensya sa Red Hot Chili Pepper, punk ska, emo (Chemical Romance), Slipknot ug Metallica aron padayong matisok ang kultura sa balak ug pangmusika dinhi ginamit ang Bisrock genre.
Sukwahi sa ubang mga banda nga nagsugod paghugoy-hugoy isip managbarkada, o managsilingan, o college classmates, silang Bisoy ug Ronnie naningkamot nga makigkumbuya sa mga bag-ong sakop sa banda. Sila usab kanhi estranghero sa usag-usa ug nagkauban lang sa dihang nabungkag na ang ilang tagsa-tagsa ka mga banda, si Bisoy sa "Igan" samtang si Ronnie sa "First Friday". Nanawagan ang duruha sa 93.1 Smash FM alang sa ilang panginahanglan og bag-ong gitarista ug drummer. Si Joje mao ang pinakabag-ong sakop nga nitikang sa dihang gihimo kining maong pakighinabi.
Silang Ronnie ug Raphy nagkanayon nga usa ka oportunidad ang ilang pagsugod nga mga total strangers tungod kay kining paagiha lig-ong makasukod sa level sa ilang musicality ug tolerance.
"Mas maayo nuon nga total stranger sa mi kay anha namo makita kon magka-wavelength ba gyud mi when it comes to making music. Anha diha makita kon magka-jam ba gyud mi nga dili gud mi parehas sa uban nga magkabarkada, in the essence of the word," hinugpong nga pamahayag sa duruha.
Kon lyrics ang pagahisgutan, hugot nakong irekomendar ang mugna ni Bisoy. Siya usa lamang sa maihap nga mga kompositor nga adunay dakong pagtamod ug pagmahal sa Sugbuanong pinulungan.
Giugmad ni Bisoy ang kadato sa bokabularyong Bisdak ug kadagaya sa romantisismo diha sa "Mutya" - Kung ang mobabag sa atong relasyon/bukid, akong katkaton/pastilan ning gugmaha/ikaw mutya akong pag-asa/ang kagahapon nga nagkagidlay/sa huyohoy sa hangin mitalidhay/apan padayong nakigbisog/naglaom nga sa gugma mabusog."
Ang Bisrock nga komunidad misaludar na sa kainit sa Agipo sa dihang nakahigop sa "Sikwati" - usa sa ilang tracks nga makalingaw sabayan. "Sayo sa kadlawon si Lolo nibangon/namukaw ni Lola kay siya magpatimpla/sikwati iyang giingon/kay lami kuno higopon/tiyan init na, humot pa gyud ang ginhawa. Ug bisan pa man gigawngan na usab kini sa double-meaning fashion, makapahimuot ang Sikwati tungod sa gibakyaw niining mensahe - ang kultura sa pagkamanginomay sa mga Bisdak og sikwati.
Alang sa dugang nga kahibalo niadtong buot motilaw sa Sikwati nga nibukal sinugnoran sa Agipo, email sa agipo_music@myway.com o kaha tawag sa 4216315 ug pangita-a si Ronnie. Mahimo usab nga mo-text kang Bisoy sa 09272245571. Aduna usab silay account sa myspace.com, ang agipo_music@hotmail.com.