Siya lumad nga taga Pangasinan apan napadpad dinhi sa Sugbu lima na katuig ang milabay gumikan kay siya maoy nagdumala sa Psamstre Enterprises, ang ekslusibong tig-apod apod sa New Placenta beauty products nga giduso sa merkado ni Miss International ug Supermodel Melanie Marquez. Si Victor gradwado nang daan sa kurso nga Marine Engineering apan gumikan sa iyang tahas nga palambuon ang ilang negosyo dinhi sa Sugbu mibalik siya sa tunghaan. Niadtong Marso gitapos ni Victor ang iyang ikaduhang kurso, Bachelor of Science Major in Management diha sa Southwestern University.
Samtang nagtungha pa siya sa SWU, si Victor nga dunay gitas-on nga 5'11 maoy napiling Mr. University 2003-indigay sa kaalam ug kaambongan nga gisalmutan sa nagkalain-laing representante gikan sa mga unibersidad dinhi sa Sugbu. Niini usab nga panahona nadala sa bul-og sa modeling si Victor diin nakauban niya ang kanhi nila endorser sa ilang kompaniya nga si Mystica. Una niini nakaplagan usab siya sa bantugan nga designer dinhi sa Sugbu nga si Dexter Alazas ug mihimo niya isip usa sa models nga nasakop sa A.D. Models Philippines.
Si Victor nga nahinabi sa OkRyan sa dyla909 khz niadtong nakalabay nga buwan namahayag nga makalingaw ang kinabuhi sa usa ka modelo. Pinaagi usab niini makabaton ka og dakong pagsalig sa imong kaugalingon katakus ingon man makakat-on ka nga makighugoyhogay sa nagkalain laing matang sa mga tawo. Apan matud pa niya kon ang usa ka binuhat buot gayud nga maglampuson angayan nga manimpad una sa kaulohan sanglit ginagmay ra ang talent fee dinhi sa Sugbu.
Puno sa inspirasyon ang istorya sa kinabuhi ni Victor. Kini tungod kay sama sa kadaghanan nasinati usab nila ang mag-ilaid sa kalisod samtang didto pa sila sa Pangasinan kaniadto. Apan gumikan sa pagpaningkamot ilabi na sa iyang maguwang nga si Jim nahimugso ang Psamstre Enterprises ug inanay nga nahaw-as sila sa kapobrehan. Karon medyo haruhay na ang ilang pagkabutang. Apan gisilsil ni Victor sa iyang alimpatakan nga dili siya angay nga modako ang iyang ulo o maghinambugero gumikan kay sa usa lang ka pagpangpamilok mahimong mahanaw ang tanan kon maoy pagbuot sa Ginoo. Busa ang iyang mensahe alang sa tanan, "padayon sa pagtuman sa inyong pangandoy labaw sa tanan ayaw pagkawa sa paglaum dinunyugan sa tiunay nga pagsalig sa gahom sa Ginoo."