Mahal si Budoy, Ate Vi na lang

Duna koy nasarap nga balita gikan sa usa ka kasaligang tinubdan, nga kuhaon unta isip indorser si Budoy sa International Pharmaceuticals Inc. kon IPI, alang sa usa ka sa ilang mga produkto, apan sa pagbungat kono ni Budoy sa iyang asking price, kalit kaayong misibog ang kadagkoan sa IPI, kay dili sayon ang kantidad nga gipangayo ni Budoy, tunga sa milyon kon P500,000.00.

Ingon na diay ana ka mahal si Budoy karon, o dunay laing katarungan si Budoy nganong nagpamahal siya para sa IPI. Wa lang kaha manimalos kini si Budoy? Tingali, nanghangyo si Budoy sa IPI kaniadto. Magkataykatay man sad god ang mga istorya, kay may mga tawo man sad sa IPI nga pasaligon ka, unya balibaran diay ka, human sa pila ka adlaw nimong tawag tawag ug balik balik sa ilang buhatan.

Pero nakakita ang IPI og dumadapig, kay nakuha kono nila sila si Vilma Santos ug Senador Ralph Recto nga take note, way bayad, kondisyon nga ang IPI kono unya maoy mo-apod-apod sa tanang mga campaign materials alang ni Senador Recto nga mobalik pagdagan sa pagka senador. Reliable ang akong source, ha, take note.

Sa laing bahin miingon ang pipila ka mga Sugboanong artista nga gwapo ra kono kaayo si Jericho Rosales isip Manny Pacquiao. Hinoon, daan na nga miingon ang producer nga si Rose Flaminiano nga wa siyay laing nahunahunaang artista nga angayan nga modala sa papel ni Manny Pacquiao. May nangutana usab kon nganong gipakyaw na ni Manny Pacquiao ang halos tanang mga commercials. Matud pa ni Josie Pereyra, wa kono tay mahimo ana, kay maoy gusto sa mga kompaniya.