Show human sa workshop

Nag-react si Dennis Barabat sa Vocal Chords Talent Center kalabot sa atong gituki dinhi sa miaging semana kalabot sa atong pangindahay nga unta dunay mga follow up nga usa ka concert o usa ka show alang sa mga mananaog sa nagkalainlaing bangga. Atong gihisgutan nga kon dili man gani himoong endorsers ang mga winners alang sa mga Cebu- based nga mga dagkong kompaniya.



Pwes gibalita ni Dennis nga duna gayo'y follow-up nga usa ka show ang iyang mga talents sa iyang mga workshops, ug lain na usab nga show ang ipahigayon niya diha sa E-Mall karong adlawa, alas 3:00 sa hapon alang sa mga bag-o niyang mga talents nga abagan sa mga karaan niyang mga talents sa Vocal Chords Talent Center. Suportado usab kini sa mga ginikanan sa maong mga talents, sa mga estudyante usab niya sa Sacred Heart College diha sa Lawaan, Talisay ug sa mga nagdumala sa maong tunghaan mismo. Ang naasoy nga show, gitawag og "Summer Workshop Culminating Activity" Ang mga guest performers mao ang nabantog na kaayong Mega Boys, Vocal Chords Band ug mga bag-ong mga experts sa karatedo nga magpakita sa ilang abilidad sa martial arts.

Naa niining hulagway si coach Dennis Barabat [taliwaa] kauban ang iyang mga talents. Si Dennis ug mga kauban nanghinaot nga daghan pang moggahin sa ilang panahon sa mga mahinungdanong kalihokan, inay magbuhat sa mga butang nga ngil-ad.