Uyab ni Martin, mabdos

Kumpirmado nga mabdos ang uyab ni Martin Nievera nga si Katrina Ojeda apan wala pa hinoon matino kon pila na ka buwan ang iyang tiyan.

Ang nasiguro sa mga himantayon mao nga hayan mamahimong maayo nga inahan si Katrina ngadto sa iyang anak, sanglit mahiligon man ang naulahi og mga bata, gani pre-school teacher man siya.

Wala usay nakitang dautan kon momabdos si Katrina gumikan kay hagbay ra nga na-annul ang kasal ni Martin ug Pops Fernandez.

Alfred pang-international na

Dunay himoon nga teleseries si Alfred Vargas didto sa Malaysia apan sanglit sa July pa magsugod ang taping niini, wala pa ibutyag sa iyang manager nga si Lolit Solis ang mga detalye sa maong proyekto.

Ang tsika mao nga hayan mahinayon og kuyog si Alfred sa fashion show ni Pitoy Moreno ngadto sa mga key cities sa Amerika sunod buwan.

Si Alfred dinhi sa Sugbu kagahapon sanglit siya maoy midala sa papel ni Lapu-Lapu, atol sa reenactment sa 'Kadaugan sa Mactan."

Kauban niya sila si Monching Gutierrez ug Criselda Volks.

Juliana, misulod sa gaybar

Gikataw-an lang ni Juliana Palermo ang taho nga nasigpatan siya nga misulod sa usa ka gaybar didto sa kauluhan.

Matud ni Juliana sa interview sa PangMasa nga walay dautan kon musulod siya sa usa ka gaybar apan nahimuot lang siya kay dili tinood ang taho, hinungdan nga mikatawa na lang siya.

Suma pa nga daghan og kaanggid og hitsura si Juliana busa posibli nga usa niini maoy nasigpatan nga misulod sa gay bar.

Hinoon nakasulod na si Juliana og gaybar kaniadto sa dihang host pa siya sa 'Secrets" talk show sa ABC-5 diin usa sa mga tapings gihimo didto sa mao nga lugar.