Robin nanghagis sa 'Bahay ni Kuya', nakiglips to lips kang Keanna

Labihan ka paspas sa mga panghitabo. Human miangkon si Rustom Padilla nga usa siya ka bayot misulong gahapon sa buntag ang iyang igsuon nga si Robin didto sa Pinoy Big Brother House.

Naglungot-lungot ang 'bad boy" sa Philippine Cinema gumikan sa giingon pagsul-ob ni housemate Christian Vasquez og sinena sa babaye agig pagbugal-bugal sa pagka bayot ni Rustom.

Gisukmag sukmag ni Robin ang pultahan sa balay sanglit buot niya nga musulod aron mahinabi si Christian.

Wala dangti og dugay, gipasulod ni Big Brother si Robin diin nag-atubang silang tulo didto sa confession room kauban usab sa housemate nga si Keanna Reeves.

Ang ending nangayo og pasaylo si Christian ngadto kang Robin ug gidawat ra usab kini sa naulahi.

Sa wala pa hingpit nga nanamilit si Robin sa balay giingong gihagkan niini si Keanna sa mga ngabil ug giingnan nga giisip na siya nga miyembro sa pamilyang Padilla.

Samtang giisip nga "instant superstar" si Keanna sa pagkakaron sanglit misalig kaniya si Rustom aron siya maoy sultihan sa tinood niini nga pagkatawo.

Matud pa sa mga obserbasyon nga nahipos sa PangMasa inanay na nga nakabaton og maayo nga imahe si Keanna lahi kaniadto nga giisip siya nga kiatan ug laagan.

* * *

Gimmick ug scripted ang PBB. Kini maoy komentaryo nga nasagap sa PangMasa gikan sa nagkadaiyang mga kasuokan didto sa kauluhan.

Matud pa sa mga himantayon nga nahisama og action movie ang tanang panghitabo diin human ang rebelasyon, misulong gilayon si Robin sa balay aron panalipdan ang iyang igsuon.

"Parang pelikula ang mga eksena. Pagkatapos umamin ni Rustom, heto naman at sumusugod na nagwawala si Robin? Ano ang feeling nila, para silang nasa action movie at bida ang magkapatid?" pong pa sa usa ka himantayon.

Nagduda ang uban nga gituyo ang tanan aron mosamot ka sikat ang PBB diin misamot usab ang pagtoo nga giplano na daan ang hingpit nga pag-angkon ni Rustom sa iyang tinood nga pagkatawo.