Laing mipalanog sa iyang pagdayeg mao si Regal Films matriarch Lily Monteverde kinsa karon pa lang namahayag nga andam siya nga hatagan og laing kahigayonan si Rustom aron mohumot ang career niini.
Ang pangutana sa kadaghanan mao nga kon unsa kaha ang role unya nga ihatag ni Mother Lily sanglit kaniadto naila man si Rustom isip dramatic aktor ug gani misuway pa kini isip action star.
Hinoon ang mga himantayon sa kauluhan dako og pagtoo nga papel sa usa ka bayot ang andam ihatag unya ni Mother Lily sa higayon nga makagawas na gikan sa balay ni Kuya ang kontrobersyal nga aktor.
Nasayran sa PangMasa nga dunay gikatakda nga pelikula ang Regal nga ang titulo mao ang "Oring, Orang, Oroses" nga pagabidahan unta nila ni Dennis Trillo, Jiro Manio ug John Pratts sa direksyon ni Joel Lamangan.
Apan si direk Joel nga nahinabi sa PangMasa ning bag-o lang mibutyag nga dili makasugod ang shooting sanglit sama sa ato nang nabalita na dinhi sa Banat Hugyaw kaniadto pa dili una modawat og gay roles si Dennis Trillo.
Nasayran usab nga busy pa si Dennis sa lain niyang pelikula ubos sa Regal nga dunay titulo nga "Pamahiin" samtang bag-o lang usab siya nga nagtaping alang sa laing telefantasiya sa GMA-7 nga giulohan og "Majika" nga isalida na karong Marso 14.
Si John usab sa laing bahin apil pa sa "Pinoy Big Brother Celebrity Edition," busa si Jiro lang ang libre alang sa shooting.
Ning pagbalibad ni Dennis ug ning pag-angkon ni Rustom nga usa siya ka bayot, gipaabot sa kadaghanan nga ang pang-award nga role adto unya ihatag ni Mother Lily sa kontrobersyal nga aktor.