Kon atong ukayon, aninawon ug tagsa tagsaon paghagpat ang mga komentaryo nga nagpasad sa nagkadaiyang websites dili malimod nga daghan ang nakadayeg sa iyang talagsaon nga kaanyag ug nindot nga korte sa lawas. Dunay ginindotan sa madanihon niyang mga mata samtang duna usay miabiba sa matam-is niya nga pahiyom. Apan luyo niining tanan duna usay mga walay batasan nga misaway ug mibiay-biay kang Anna.
"Mubo, ordinaryo og dagway ug dili angayan nga ipadala sa mga indigay sa kaanyag ngadto sa gawas sa nasud." Kini pipila lang sa mga pamahayag nga giluwatan sa pipila nga nakamenos sa katakus ni Anna. Nan tugutan ba diay natong mga bisaya ang maong mga pagsaway? Dili ug dili gyud makatarunganon.
Sa labing uwahi nga text message nga nadawat sa Banat Hugyaw gikan kang Anna niadtong Huwebes sa gabii iyang gibutyag nga kuwang na siya sa katulog sanglit kanunay sila nga mag-rehearsal ug mobisita nagkadaiya nila nga sponsors. Labaw sa tanan giangkon niya nga medyo nahulga siya og gamay kay "grabe harap harapan gyud ang pabor pabor diri. Pero bahala na maniguro lang gyud ko. Kanunay nakong giampo sa Ginoo ug ni Senyor Sto. Nino ( duna siyay gidala nga gamay nga imahen sa milagrosong bata) nga kon para ako gyud ni, para ako gyud."
Nan dayag kaayo nga gibuhat na ni Anna ang tanan ug iyang paningkamutan nga makalangkat bisan unsa sa tulo ka mga prestihiyosong korona-Bb. Pilipinas Universe, Bb. Pilipinas World ug Bb. Pilipinas International. Busa angayan lang atong duyugan si Anna ug ato siyang ubanan sa iyang mga pag-ampo aron mahuptan ang gipangandoy niya nga korona. Kay ang iyang kadaugan, kadaugan ug garbo natong mga bisaya. Ayaw paglangan samtang dili pa uwahi ang tanan!
Alang sa mga Smart subscribers paluyohi si Anna pinaagi sa pagtext ug BP20 ug ipadala ngadto sa 367.