Matud pa sa mommy ni Sarah nga nahinabi sa PangMasa pareho ka dako sa Araneta Coliseum ang venue sa concert diin 13, 000 ang mahimong masulod niini apan giingong nasugwak ang mga tawo labaw pa sa capacity.
Kini kamatuoran lang nga inilog gyud si Sarah alang sa mga provincial shows gawas nga paborito usab siya alang sa mga shows ngadto sa gawas sa nasud.
Gawas sa Little Big Star nga labihan ka taas ang rating, busy usab si Sarah alang sa "Bituing Walang Ningning" nga padayong gigama karon sa ABS-CBN.
Samtang ning bag-o lang mitambong usab si Sarah sa blood letting activity sa Damayan sa Philippine Star diin buot unta siya nga magpakuha og dugo apan low blood siya niadtong panahona.
Mitambong usab sa maong blood letting si Lucy Torres Gomez agig pagpaluyo sa maong proyekto nga gipasiugdahan mismo sa among labaw nga si Mr. Miguel Belmonte of the Philippine Star, Pilipino Star Ngayon, Pang Masa (PM), The Freeman and Banat News.
Si direk Mark Reyes nga nahinabi sa PangMasa mapasalamaton usab kaayo sa GMA-7 management tungod kay todo gyud ang suporta niini sama na lang sa paghatag sa snow ug fog machines bisan pa man kon labihan ka mahal sa abangan sa maong mga ekipo.
Gibutyag usab ni direk Mark nga mas dako na karon ang ilang set sanglit kon kaniadto 2,000 sq. m. lamang kini, karon nahimo na kini nga 4,000 sq. m. tungod kay nabakante naman ang lugar nga maoy gigamit sa Etheria kaniadto.
Ang luna nga nabakante gihimoan sa production designer nga si Rodel Cruz og bag-o nga garden susama sa Daranak Falls. Giwagtang na usab ang gingharian sa Etheria ug gipulihan kini sa gingharian sa Sapiro nila ni Dingdong Dantes ug Karylle.
Sa pikas nga bahin gipabarog usab sa designer ang 64 ft. long and 30 ft. high nga Bahaghari ship nga maoy gamiton ni JayR isip si Azulan nga hari sa mga pirata ug dunay daghang gahom gawas nga maoy leading man unya ni Amihan (Iza Calzado.)
Wala usab idawo ni direk Mark ang mamahimong dagan sa estorya sama nalang sa pagbutyag niya nga mamahimo na nga upat ka buok ang anak ni Ybrahim (Dingdong) sanglit kay gawas sa iyang mga anak kang Alena (Karylle), makabaton usab siya ug anak kang Odessa (Pauleen Luna). . - Ryan Mark