Sa nagpadayon pa lang ang audition niadtong nagsingabot pa ang Sinulog upat ka mga ngalan sa mga lokal nga personalidad ang giingong gipangulitawhan aron mosalmot sa maong bangga. Tulo ka nila mga talents sa abs-cbn-Cebu nga sila si Angela Calina, Rico Lucena ug Jude Bacalso. Ang ikaupat nga personalidad mao ang bokalista sa Junior Kilat nga si Budoy Miraviles. Apan hangtud kagahapon walay bisan usa sa mga nahisgutan ang mikomento kinsa kanila ang mopasilong sa balay ni Kuya sugod karong gabii.
Hinoon kon yak-an gyud og maayo ang mga clue nga namantala sa website sa PBB tataw na kaayo kinsa ang maong mga Sugbuanon nga lakip sa morampa karong gabii didto sa baywalk sa Manila alang sa pormal nga pagpa-ila sa dili pa hingpit nga mosulod sa balay aron makigbisog sa gitinguha nga kadaugan balig kwarentay singko ka adlaw. Ang maong mga clue mao usay gipagya ni Toni Gonzaga niadtong Sabado sa Entertainment Konek.
Pwes dali ug atong lilion ang maong mga timailhan. Unang clue mao nga ang housemate number four usa ka dalaga nga inahan ug tv host. Niadtong Domingo usab sa PBB buzz, ang usa sa mga host nga si AJ Dee mihulagway kang housemate number four isip TV host "na malayo ang nilalakbay. Nan kinsa pa may lain kondili si Angela Calina?
Ang housemate number 5 matud pa usa ka tiunay nga musician kinsa naila gumikan sa iyang lahi nga estilo sa musika. Samtang sa PBB buzz gihapon ang maong tiil sa maong musikero gipakita nga nagtsinelas og spartan. Nan ayaw kog ingna nga si Jeffrey Hidalgo kinsa gidungog nga ni-audition maoy gipasabot niadto. Imposibli nga mga tiil kadto sa naulahi sanglit ang maong nga karsones gilulho pa man gani. Si Jeffrey naila isip balladeer busa layo ra sa tinood nga lulhoon niini ang karsones ug magtsinelas pa gyud nga ang sama kaniya og kalidad nga singer kanunay man nga maka-amerkana o pormal nga sapot. Pwes balikan nato ang clue-"tiunay nga musikero ug lahi nga estilo sa musika." Nan kana wala nay laing gipasabot kondili si Budoy kinsa walay 'pakialam" unsay iyang isul-ob ug kansang reggae music naka-pahugyaw sa kauluhan sukad pa sa nilabay nga tuig.
Si Angela kaniadto pa sikat nang daan dinhi sa Sugbu ug gani kon wala pa lang siya maigo sa politika sulod sa nataran sa abs-cbn didto sa kauluhan hayan layo na unta siya ug naabot karon sa natad sa hosting. Kinsay makalimot sa iyang nawong nga nakighugyaw kang Kuya Boy Abunda matag hapon sa ETC talk show sa abs-cbn mga tulo na ka tuig ang milabay? Dili ba kalit lang siya nga nahanaw? Dili niya kadto kasaypanan sanglit ang hugyaw hagawhaw mao nga naigo siya sa ka mangtas ni Kristine Bersola nga maoy misapaw ni Angela pinaagi sa pagpacute sa producers sa maong show. Busa kon si Angela man gyud ugaling ang musulod sa balay karong gabii, walay rason nga dili nato siya paluyohan sanglit usa siya ka tinood nga talento nga sarang natong ikapanghambog.
Si Budoy maoy nagkanta sa sikat na kaayo nga "M16, baby armalite" ug daghan pa kansang banda nga Junior Kilat gikagubtan og maayo didto sa kauluhan bisan pa man og ang mga tagalog wala makasabot sa ilang mga kanta nga binisaya. Nahugyaw na usab sa maong banda ang mga taga Mindanao ning bag-o lang. Gawas pa si Budoy dili magsapayan bisan kon naka short, t-shirt ug tsinelas lang sa matag tukar nila tungod kay importante niya nga daygon sila gumikan sa nindot ug lahi nila nga matang sa musika. Busa wala gyuy duha-duha nga kon usa siya sa ipaila didto unya sa baywalk sigurado na nga ma-hugyaw gyud ang panimalay ni Kuya.
Samtang kon palapdan pa nato ang pag-ila sa ubang housemates pinaagi lang gihapon sa mga clue nga gihatag wala na usay duha-duha nga musulod karong gabii ang guapo nga si John Pratts ug ang kontrobersyal nga Sugbuanon nga si Keanna Reeves. Ngano man? Clue number one. Kanhi child star ug karon heartthrob nga bisan pa man sa iyang ka-ambongan nakasinati na og daghang kasakit pag-abot sa isyu may kalabutan sa gugma. Labaw sa tanan maayong mosayaw. Nan siya wala nay lain kondili si John Pratts.
Clue number two. Naila nga sexy star kinsa nalambigit sa daghang eskandalo ug kansang kontrobersya nakapakugang dili lang sa iyang pamilya kondili lakip na ang tibook nasud. Nakalimot na ba diay mo sa "escort service" issue nga gipabuto ni Keanna Reeves nga matud pa niya naglambigit sa mga kongresista ug mga senador? Dili ba kontrobersyal man usab ang iyang edad tungod kay nangangkon siyang 26-anyos bisan og lapas na sa 30? Gisaw-an usab og maayo ang mga detalye nga naglimin sa iyang pagkatawo ilabi na sa dihang gilimod niya ang iyang mga anak ug bana nga nanimuyo sa dakbayan sa Danao. Pwes siya ug wala nay lain pa ang gipasabot sa maong clue.
Upat lang sa katorse nga morampa karong gabii ang atong nailhan ug posibli nga tukma ang atong panag-an. Nan angayan nga atong atangan karong gabii kinsa pa ang laing napu nga nalakip.Ang importante mao nga bisan og kinsa pay masulod angayan nga atong paluyuhan ug abibahan ang atong mga igsoong Sugbuanon nga mupoyo sa pani-malay ni Kuya.