Pong pa ni Og, hilas na kaayo nga paminawon si Jennylyn ilabi na sa dihang nadunggan kini nga namulong makausa og " hayaan n'yo silang magmukhang tanga " kalabot sa mga reporters nga nisuwat kalabot sa iyang pagkahimo nga People's Choice best actress sa bag-o pa lang nahuman nga Metro Manila Film Festival.
Ang maong pamahayag ni Jen mao usay tubag niini ngadto sa mga tigbalita nga nisuwat nga nakigbalik si Jennylyn sa iyang kanhi uyab nga kadungan niya kaniadto sa Circle of 10 modeling search sa wala pa siya mosalmot sa Starstruck sa GMA-7 duha na katuig ang milabay.
Gikuyawan si Og sanglit pagkapaspas ba sa kausaban sa batasan ni Jennylyn diin kon kaniadto sa dihang nagsugod pa siya mauwawon pa kaayo apan karon medyo nasobrahan na ang pagsalig niya sa iyang kaugalingon.
Suma pa nga layo na kaayo si Jen kon pamatasan ang hisgutan sanglit nagka grabe ang pagka negatibo niini kon itandi sa iyang mga kadungan nga sila si Mark Herras, Yasmien Kurdi ug Rainier Castillo kinsa nagpabiling mapaubsanon bisan pa man sa ilang natagamtam karon nga kalampusan sa showbiz.
Nangutana si Og kon papirmahon ba sa Kapamilya og kontrata si Osang nga ang naulahi labihan man nga nakapanghinaway ug nakadaot sa abs-cbn kaniadto diin namulong pa kini nga dili gyud siya motaak sa nataran sa nahisgutan nga network bisan unsay mahitabo.
Apan gumikan niining maong kalambuan dili lang motaak si Osang sa Kapamilya kondili mopuyo pa unya siya nga libre sugod karong Pebrero kwatro hangtud na nga mapalayas siya sa balay ni Kuya.