Dili na angayang ipangutana pa ang hayag niya nga ugma gumikan kay sugod niadtong 2003 nipopo na si Jed og dili basta basta nga kadaugan sa mga international contests.
Kini naglakip sa silver prize Voice of Asia didto sa Kazakhstan ug grand champion people's choice sa susamang contest human siya nakakuha og labing taas nga buto gikan sa 32 ka mga nasud pinaagi sa online voting.
Sa samang tuig gipasidunggan usab siya isip "Breakthrough male performer of the year" sa Celebrity Chronicle nga nagbase sa Hollywood hinungdan nga naangkon niya ang President Gloria Arroyo Plaque of Distinction and Honor. Apan bisan pa man sa nahauna niyang mga kadaogan sa mga international singing contests daw wala siya mahatagi og maayong break.
Hinoon nabag-o ang tanan human siya nangharos sa bag-o pa lang gipahigayon nga Olympics of Performing Arts didto sa Hollywood diin gipildi niya ug ni Rizza Navales ang mga representante gikan sa 52 ka nasud.
Unom ka gold medals ang naangkon ni Jed gikan sa unom ka category sama sa pop, broadway, gospel ug original category ingon man pop duet ug broadway kauban si Rizza.
Gumikan niini gipapirma na si Jed og kontrata sa ASAP Mania sa ABS-CBN diin usa na siya karon ka regular member sa nahisgutang show kauban ang mga sikat nga singers sa Champions League. Nihataw usab og maayo ang iyang latest album ubos sa Universal Records nga giulohan og "Songs Rediscovered" nga naglakip sa mga kanta nilang Elton John, William Brothers ug Rick Price.