Lonely na naman nitong mga linggong ito
Pagka’t Misis ko iniwan na naman ako,
Hindi hiniwalayan ibig sabihin ko
Kundi sa anak ko’y bumisita’t nagtungo.
Mabuti kung ’yun lang ay sa isang probinsya,
Ngunit sa Londres lang naman s’ya bibisita,
Anak ng Put Your Head On My Shoulder talaga!
Ito ay para manood lang kay Madonna!
Anak ng Poker Face naman ni Lady Gaga!
Pa-pa-Paparazzi Don’t Preach namang Judas ka!
Manonood lang kay Madonna sa London pa?!
Eh Eh... Nothing Else I Can Say sa’king mag-ina.
At malamang maki-Olympics pa nga sila
Ng aking hija dun na si Jocas Eightria,
Ano pa nga ba eh di mabuti pa sila ...
Samantalang ako dito’y nangungulila.
Pero ba’t ako t’wing aalis ang asawa,
Nalulungkot ako at hirap na mag-isa,
Subalit bakit at ako ay nagtataka,
‘Yung iba naman o karaniwa’y ang saya?!
Ewan ko lang hindi sa ako’y nanghuhusga,
Sa pagkaunawa ko’y pagkakataon na
Na lumabas nang lumabas... s’yempre magpyesta
Nitong mga lalaking wala ang asawa.
Subalit inyong lingkod tila kakaiba,
Kunsabagay, ba’t ‘di kaya subukan muna?
Ngek! Ako lamang siguro ay “bumait” na;
Iba na ideya ng “oras ng ligaya.”
Ano tingin n’yo ako ba’y may diperensya?
Sa alam ko’y WALA... ako lang ay may phobia,
Matagal na ito’t ‘di po nagpapatawa,
Mayroon akong takot kapag nag-iisa.
Waring hindi ako mapakali talaga,
Lalo na sa pagb’yahe at walang kasama,
Tingnan n’yot tunay na hindi makapag-isa,
Pagkat tatlo-tatlo pa ang tawag sa phobia.
Tawag dito’y “Isolophobia,” “Monophobia” at “Autophobia,”
‘Di na matandaan kung kailan nag-umpisa,
Ngunit sinusubukan ko namang makontra,
Kaya nga pumapayag ding umalis sila.
Kailangan lang sa aki’y laging abala,
Yaon bang ginagawa ay isang katerba,
Ngayon ay hindi na ninyo ipagtataka
Kung bakit parang hindi na nagpapahinga.
Pero ano ang seryong tingin n’yo talaga?
Mas okey pa ba at aprub ang aking phobia?
Kaysa sa “Misiphobia” — takot sa asawa!
O “Isaphobia” — fear na misis lang ay ISA!
Isang phobia lang hindi kinatatakutan,
Maaaring magtaka’t isang kalokohan,
‘Di ako nagbibiro at totoo po ‘yan,
‘Yan po’y ang sakit kong phobia-he-b’yahe na lang!