Dear Dr. Love
A very pleasant greeting to you and your staff. Just call me Happy Heart.
Gusto ko ang tawag na ito dahil talagang lagi akong happy. Mapagpatawa at palaging center of attraction sa gatherings dahil sa sense of humor ko.
Twenty one years old na ako at isa pa ring binata na nagtatrabaho bilang call center agent.
May nagustuhan akong kasamahan sa trabaho. Bago lang siya. Balak ko siyang ligawan pero nalaman kong may asawa na siya. ‘Yun palang sumusundo sa kanyang lalaki ay asawa niya at mayroon na silang baby.
Dahil dito’y hindi na ako Happy Heart at nagtataka ang mga kasamahan ko dahil hindi na ako nagjo-joke.
Paano ko matatanggal sa isip ko ang babaeng ito na mahal ko?
Happy Heart
Dear Happy Heart,
Hindi ko alam kung paano mo siya malilimutan. Ang masasabi ko’y kailangan mo siyang limutin sa ano mang paraan dahil may asawa na siya. Kung papaano, bahala kang gumawa ng paraan.
Hindi lang naman nag-iisa ang babaeng iyan. Natitiyak ko na kung igagala mo ang iyong pananaw, marami kang makikita riyan na karapat-dapat mahalin at ibigin.
Huwag mong hayaang huminto sa paggalaw ang mundo dahil lamang sa isang tao.
Dr. Love