Dear Dr. Love,
Kamusta po kayo? Lumiham po ako para humingi ng inyong mahalagang payo tungkol sa pag-ibig.
Ako po si Al Trono, 34 years old, binata at tubong Lutoban, Zamboangita Negros Oriental. Sa kasalukuyan po, narito ako sa pambansang piitan dahil sa kasong frustrated homicide.
Bagaman isa akong bilanggo, mayroon din naman akong pangarap sa buhay at ito ay makatagpo ng isang babaeng mamahalin at magmamahal sa akin ng habang-buhay.
Alam kong sa isang tulad kong bilanggo, ang mga kababaihan ay ilag makipagkaibigan at magpaligaw dahil sa pangambang ang isang tulad ko ay talagang talamak na masamang tao.
Pero hindi naman po lahat na bilanggo ay masamang tao. Karamihan sa amin, tulad ko, ay naging biktima lang ng mga pangyayari at kung hindi naging maagap ay baka ako naman ang napatay ng mga taong nais makapangyari ang kanilang masamang intensiyon.
Ganito po ang insidenteng nagbunsod kung bakit ako nakulong.
Ang aking nakatatandang kapatid na lalaki ay naging biktima ng pambubogbog ng apat katao mula sa aming karatig na barangay.
Kamuntik na pong namatay ang aking Kuya kundi lang siya nadala agad sa ospital. Malaki po ang nagastos sa pagpapagamot ng kapatid ko.
Kaya po nag-file kami ng kaso sa korte. Siguro, iniisip nila na baka ma-convict sila kaya gusto nilang ipaurong ang kaso.
Dahil dito, ako ang napagbuntunan nila ng galit.
Isang umaga, habang ako ay naglalakad sa kalsada, biglang may humintong isang motor sa aking likuran.
Nang lingurin ko kung sino, nakilala ko siya ang isa sa mga bumugbog sa kuya ko.
Bigla niya akong tinutukan ng baril. Mabuti na lang at hindi niya ito ipinutok sa akin.
Ang ginawa ko, nagmamadali akong umuwi sa bahay at kumuha ng baril at siya ang tinuluyan kong barilin sa takot kong ako ang mapatay niya.
Mabuti na lang at hindi siya tuluyang namatay. Kaya ngayon, heto ako, sentensiyadong makulong nang mula anim hanggang 12 taon sa kasong frustrated homicide.
Ayaw kong sabihing iginanti ko ang utol ko sa ginawa nilang pagbugbog sa kanya.
Unang-una, sinampahan namin sila ng kaso at kami pa nga ang biktima ng kanilang harassment para iurong ang demanda.
Kaya nga lang dahil sa hindi maiwasang pangyayari ako naman ang nakulong dahil sa nabanggit na pangyayari.
Sa tingin po kaya ninyo, may babae pang magkakagusto sa akin dahil sa nakulong ako?
Salamat po sa pagbibigay pansin ninyo sa liham kong ito at nawa’y sa tulong ng pitak ninyo, magkaroon ako ng mga kaibigan sa panulat.
Sumasainyo,
Al Trono
MSC Student Dorm
Bldg. 4 Camp Sampaguita
Muntinlupa City
Dear Al,
Gaya nga nang nabanggit mo, ang isang bilanggo o nabilanggo ay hindi madaling makahanap ng babaeng iibig sa iyo nang hindi nililingon ang pinagdaanan mong karanasan.
Pero sa mga nakakaunawa, alam naman nilang hindi lahat na nabilanggo ay talamak sa masama kundi karamihan ay biktima ng kabiglaanan at maling desisyon.
Kaya pagbutihin mo ang rehabilitasyon diyan sa loob para madali kang makalaya. Sa uulitin, maging maingat ka sa paggawa ng desisyon.
Huwag kang padalus-dalos para hindi ka magkaproblema.
Sana kinasuhan mo na lang uli ang lalaking iyon kaysa binaril mo dahil sa takot na baka maunahan ka pa niya.
Good luck sa paghahanap mo ng babaeng mamahalin habang buhay.
Magkaroon ka sana ng maraming kasulatan para makatighaw ng pangungulila mo diyan habang pinagsisilbihan mo ang naging hatol sa iyo ng korte.
Dr. Love