Dear Dr. Love,
Isang pinagpalang araw ang bati ko sa iyo at sana’y mapuspos ka ng biyaya ng Diyos sa pagtanggap sa sulat kong ito.
Tawagin mo na lang akong Mauro. Sa Disyembre ay 39-anyos na ako. Pero sa kabila ng edad ko ay malakas pa rin ang aking appeal sa babae.
Hindi naman ako guwapo pero sabi ng iba, matikas daw ang aking katawan at magaling mangusap kung kaya maraming babae ang nagkakandarapa sa akin.
Playboy ako at wala pang asawa hangga ngayon. Akala ko lahat ng babae ay pare-pareho. Laruan sa aking palad. Nagkamali ako nang makilala ko si Michelle. Napakahinhin at ang mga mata’y nangungusap. Para bang nagmamakaawa.
Niligawan ko siya. Pero hindi tumalab ang aking appeal sa kanya. Binasted ako.
Parang malaking hamon sa akin si Michelle. Sa tingin ko’y natagpuan ko na ang babaeng aking pakakasalan. Pero bakit kung sino pa ang ibig kong seryosohin ay siya pang ayaw sa akin?
Ano ang gagawin ko?
Mauro
Dear Mauro,
Sa tingin ko’y disenteng babae si Michelle at talagang kakaiba siya sa mga nauna mong niligawan na easy-to-get.
Marahil, bistado niya ang iyong kalibre na nangungulekta ng babae kaya ni hindi ka naka-first base sa kanya.
Hindi ko alam kung papaano mo pa siya madidiskartehan nang tama para masilo ang kanyang puso. Marahil, dapat mong patunayan sa kanya na seryoso ka sa iyong pangingibig at handa mo siyang pakasalan.
Dr. Love