Ang duwa gitakdang sugdan sa alas 5:00 sa hapon.
Seguro gyud nga mangita ang VFI-USJR og paagi aron dili masubli ang ilang nahiaguman nga kaparotan batok sa CDO Burger-UV sa Game-1 diin giayo kini og lubong sa iskor nga 78-101.
Sa maong duwa, mibanat gilayon ang CDO Burger-UV gikan sa pagsugod hinungdan nga nagkapuliki ang VFI-USJR pagpanagang ug wala kini lung-i hangtod na sa katapusang gutlo sa duwa.
Nangandoy sab ang CDO Burger-UV nga ilang maharos og daog ang tulo ka duwa.
Sa laing bahin, ang Metro Gaisano-University of Cebu (UC) Webmasters misungag sa Skygo-Southwestern University (SWU) Cobras, 69-63, aron pag-angkon sa ikatulong dapit.
Bisan pa man sa nasinating kalisud sa Metro Gaisano-UC, apan nagmalampuson gihapon kini pagpukan sa Skygo-SWU human kini makabawi sa naghinapos nga bahin sa duwa.
Ang Skygo-SWU milabaw og nuybe puntos, 49-41 sa nahabiling 50 segundos sa ikatulong kuwarter, apan sila si Jonathan Canceran ug Marvin Ceniza mipabuhagay og duha ka triples aron pagkitkit sa labaw ngadto na lang sa dos puntos, 47-49.
Sa kakugi ug paningkamot sa Metro Gaisano-UC nakatabla kini sa iskor, 62-62 ug nailog pa nila ang labaw human masulod ang mahinungdanong three-point ni Ceniza sa iskor nga 65-62. Nainat pa kini ngadto sa singko puntos, 67-62 nga maoy nakapaluya sa Skygo-SWU.
Sa pasiunang duwa, ang Lloyd Poligrates-led Danao Selection ni councilor Oscar 'Boying' Rodriguez milubong sa University of San Carlos (USC) Warriors, 74-58 sa ilang goodwill encounter.
MGA ISKOR
Metro Gaisano-UC (69) - Abellanosa 17, Canceran 13, Abatayo 8, Flanco 8, Cipriano 8, Ceniza 8, Abella 5
Skygo-SWU (63) - Litorja 13, Maguate 11, Belande 8, Gianchiang 8, Jalandoni 7, Zanoria 7, Escober 5, Canonigo 4