1565, ikaunom nga expedition sa kadagatan!
Legazpi girumbo ang Sugbuanong gingharian
Gihasi, gikanyonaso ang lapyahan!
Nalisang gihakot ang kabataan, kababayen-an,
Katigulangan! Away malikayan! Kinabuhi dili mapagan.
Quinientos pintados! Gibansaybansay sa kabukiran,
Ni Raja Tupas! ang umaabot nga gubat gipangandaman.
1569 kadto, sa unang adlaw sa Septyembre
Kota sa banyaga San Pedro giatake
Ulhos-ulhos sa adlaw ug gabii!
Tigbas didto! Duslak dinhi!
Gipanggaroti ug gipang-olisi
Mityabaw sa kasakit ug nagkisikisi.
Sa kaabtik ug kalantip sa mga Sugboanon sa kayutaan
Inabagan sa Portuguese sa kadagatan
Ang malupigong banyaga gialirungan,
Gilukong! walay kadaganan.
1570 sa kawhaa’g tulo sa Marso
Kota San Pedro gikanyonaso ni Portuguese Gonzalo
Nalisang ang malupigon sa nagdilaab nga kalayo!
Miisa sa kamot! Kinabuhi namiligro.
Mga banyaga! Naatraso?
Miikyas padulong sa Iloilo
Sa kaisug ug kaigmat sa manggugubat sa Sugbo?
Quinientos Pintados ni Raja Tupas! atong ipasigarbo!